Qazaqstan áskerleri myńdaǵan shaqyrymdy eńserip, batysqa jetti

ASTANA. QazAqparat - «Ońtústik» jáne «Shyǵys» óńirlik qolbasshylyqtary, sondaı-aq Desanttyq-shabýyldaý áskerleriniń quramalary men áskerı bólimderi birneshe myńdaǵan shaqyrymdy eńserip, Mańǵystaý oblysyna jetti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

«Ońtústik» óńirlik qolbasshylyǵynyń áskerı bólimderi oqý-jattyǵý ótetin aımaqqa óz betterimen jetken. «Shyǵys» óńirlik qolbasshylyǵynyń barlaý, tanktik jáne artıllerııalyq bólimshelerin batysqa temirjol kóligimen alyp barǵan. Al 35-shi desanttyq-shabýyldaý brıgadasynyń desanttyq-shabýyldaý batalony Qapshaǵaıdan Aqtaýǵa áskerı-kólik avıatsııasymen jetkizildi.

«Batys-2018» oqý-jattyǵýynyń stsenarııi boıynsha Qazaqstannyń batys óńirinde zańsyz qarýly qurylymdardyń áreketterinen jaǵdaı ýshyǵyp ketken. Osy maqsatta  óńirdegi turaqty jaǵdaıdy qalpyna keltirý úshin áskerler túrlerinen toptama quryldy. Oǵan «Batys» óńirlik qolbasshylyǵynyń áskerler qolbasshysy jetekshilik etedi.

Eske salaıyq, keshe QR Qorǵanys mınıstri Nurlan Ermekbaevtyń buıryǵy boıynsha Qarýly Kúshterdiń áskerı bólimderi men quramalary oqý-jattyǵý dabyly boıynsha kóterilgen edi.

Selektorlyq rejımde ótken keńes barysynda «Shyǵys» jáne «Ońtústik» óńirlik qolbasshylyqtarynyń, Desanttyq-shabýyldaý áskerleriniń birqatar áskerı bólimderine Qazaqstannyń batys óńirine toptasý tapsyrmasy berildi.