Qazaqstan áskerindegi jaýyngerlik daıarlyq tásilderi qalaı ózgerip jatyr

ASTANA. QazAqparat – Álemdegi qaqtyǵystardy eskere otyryp, Qazaqstan áskerindegi daıarlyqqa tıisti ózgerister engizilip jatyr. Bul týraly QR Qorǵanys mınıstriniń orynbasary Sultan Qamaletdınov aıtty, dep habarlaıdy QazAqparat tilshisi.

«Basqa memleketterdiń qarýly kúshteri bul salaǵa tereń taldaý júrgizip, soǵys is-qımyldarynyń barysyn baıqap otyr. Osydan tıisti qorytyndylar da jasaldy. Bir-birine uqsas qarýly qaqtyǵystar bolmaıdy, árqaısysynyń ózindik ereksheligi bar. Sondyqtan, biz de taldaý júrgizip, tıisti qorytyndylar jasaımyz, jaýyngerlik daıyndyq baǵdarlamasyna ózgerister engizemiz», - dedi Sultan Qamaletdınov Senatta tilshiler suraǵyna jaýap bere otyryp.

Onyń aıtýynsha, qashyqtan basqarylatyn drondardyń operatorlaryna qatysty oqý-jattyǵýlarǵa erekshe nazar aýdarylyp otyr. Bul baǵytta elimizde olardyń daıarlyǵyna basa mán berilgen.

«Qazirgi kezde álemdegi áskerı qaqtyǵystarǵa qarasaq, ushqyshsyz apparattar barlaý qyzmetine, soqqy jasaý is-qımyldaryna jumyldyrylyp jatyr. Ekinshiden, artıllerııanyń da múmkindigi zor. Jaýyngerlik daıyndyq barysynda artıllerııa áskerlerin jumyldyrý eń keń taraǵan tásilderdiń birine aınaldy», - dedi mınıstrdiń orynbasary.

Budan buryn habarlanǵandaı, Sultan Qamaletdınov qarý-jaraq pen áskerı tehnıkany memlekettik satyp alý boıynsha tıisti jospar bar ekenin aıtty.

Sonymen qatar, bıyl áskerı saladaǵy oqytýshylar men dárigerlerdiń jalaqysy ósedi.

Mınıstrdiń orynbasary Qazaqstanda jeke áskerı kompanııalar qurylmaıtynyn málim etti.