Qazaqstan áskerinde burynǵydaı álimjettik joq – Qorǵanys mınıstri

NUR-SULTAN. QazAqparat – QR Qorǵanys mınıstri Nurlan Ermekbaev Ortalyq kommýnıkatsııalar qyzmetinde «Áskerdegi álimjettik qashan joıylady?» degen suraqqa jaýap berdi, dep habarlaıdy QazAqparat tilshisi.

«Qazir bizdiń áskerde Keńes zamanyndaǵydaı «Dedovşına» joq. 90-jyldardyń basynda bolǵan shyǵar, biraq qazir joq. Onyń basty sebepteriniń biri – qazirgi merzimdi áskerı qyzmet bir jylǵa ǵana sozylady. ıAǵnı burynǵydaı ysylǵan sarbaz, jas sarbaz degen túsinik joq. Barlyǵy bir shaqyrylymmen keledi nemese aradaǵy aıyrmashylyq asa kóp bolmaıdy», - dep jaýap berdi N. Ermekbaev tilshi suraǵyna.

Sonymen birge, mınıstrdiń aıtýynsha, qazir komandırlerge ujymdaǵy ahýaldy qadaǵalap, jarǵydan tys qarym-qatynasqa jol bermeý tapsyrmasy mindettelgen.

«Árıne, kez kelgen erler ujymynda eregis pen janjaldar bolady. Biraq eresekteý sarbazdardyń ózinen keıingilerdi qorlaýy, jarǵydan tys áreketterge májbúrleýi sekildi júıeli kórinis joq», - dedi N. Ermekbaev.

Buǵan deıin Qorǵanys mınıstri turǵyndarǵa kamýflıaj reńkindegi kıim kııýge tyıym salynbaıtynyn túsindirgen edi.