Qazaqstan áskerı ushaqtar sanyn arttyrýǵa mán berip otyr

ASTANA. QazAqparat - Jyl saıyn Qazaqstanda jaýyngerlik avıatsııadaǵy ushaqtar sany artady.  Bul týraly QR Qorǵanys mınıstri Sáken Jasuzaqov málim etti, dep  habarlaıdy QazAqparat.

«Áýe qorǵanysy kúshin jabdyqtaýǵa sońǵy býyndy  «4++» joıǵysh ushaqtary, SI-295 áskerı-kóliktik ushaqtary jetkizildi. Aǵymdaǵy jyly eki jıyntyǵyn alǵannan keıin, biz áskerı-kóliktik avıatsııany jasaqtaýdy aıaqtaımyz. Áskerı avıatsııaǵa tek shabýyldaý tikushaqtary ǵana emes, sonymen qatar jaýyngerlik Mı-35 tikushaqtary da tartyla bastady. Tórteýin aldyq jáne taǵy da tórteýi jetkiziledi. 2020 jylǵa qaraı osy baǵyttaǵy protsesti aıaqtaıtyn bolamyz»,-dedi mınıstr Májilistegi Úkimet saǵatynda.

Budan bólek, S. Jasuzaqov áýe shabýylyna qarsy qorǵanys kúshiniń jaǵdaıy týraly baıandady. Reseı tarapynan bes S-300 alyndy, olar jyl sońynda jaýyngerlik kezekshilik tártibine qoıylady.

Sonymen qatar radıotehnıkalyq ásker boıynsha keıbir máseleler bar kórinedi. Degenmen de otandyq radıolokatsııalyq úsh koordınattyq «Nur» stansalaryn qurý jumystary uıymdastyryldy.

Onyń alǵashqy jıyntyǵy Astanany qamtý úshin ornatyldy, al ekinshisi Qaraǵandyda qoıylyp jatyr. Aldaǵy ýaqytta bul stansalar burynnan paıdalanylyp kele jatqan apparattardy almastyratyn bolady.

Sondaı-aq ol elordada áýe shabýylyna qarsy qorǵanysqa erekshe nazar aýdarylyp otyrǵandyǵyn atap ótti. Osy rette tómen de ushatyn apparattardy anyqtaıtyn jabdyqtar ornatylýda.