«Qazaqstan arýy-2019» ulttyq baıqaýynyń formaty ózgerdi
Uıymdastyrýshylardyń aıtýynsha, aǵymdaǵy jyly baıqaý aıasynda QR Mádenıet jáne sport mınıstrliginiń qoldaýymen áleýmettik joba iske qosylady.
«Onyń maqsaty - el óńirleri boıynsha jarnamalyq-aǵartýshylyq rolıkterdiń arnaıy toptamasyn ázirleý. Eger buǵan deıin qyzdar joba úshin vızıtka jazyp, ózi, otbasy jaıynda ǵana áńgimelep berse, aǵymdaǵy jyly árbir qatysýshy ózderiniń súıikti qalalarynyń, óńirleriniń týrıstik múmkinshilikterin tanystyrady. Bul ishki týrızmdi damytýǵa septigin tıgizedi», - dedi «Qazaqstan arýy» baıqaýynyń dırektory Alena Revlına.
Uıymdastyrýshylardyń deregine qaraǵanda, óz óńirin ózgelerden qyzyqty ári úzdik tanystyrǵan qatysýshy «Týrızm arýy-2019» ataǵymen marapattalatyn bolady.
Ádil tórelik pen baıqaýdyń ashyqtyǵyn qamtamasyz etý maqsatynda ulttyq tóreshiler aqtyq synǵa joldama alatyn 5 qatysýshyny tańdaıdy. Al jeńimpazdy qazaqstandyqtar SMS-daýys berý arqyly anyqtaıdy. Ulttyq baıqaý jeńimpazynyń esimi 2 mamyr kúni Nur-Sultan qalasynda belgili bolady.
Aıta keteıik, «Qazaqstan arýy-2018» baıqaýynyń jeńimpazy Álfııa Ersaıyn AQSh-ta ótetin «Álem arýy-2019» 68-shi jyl saıynǵy jahandyq baıqaýda elimizdiń namysyn qorǵaıdy.