Qazaqstan armııasy 16 myń jas sarbazben tolyǵady

ASTANA. QazAqparat - Qazaqstanda «Kóktem - 2017» merzimdi áskerı qyzmetke azamattardy shaqyrý naýqany ótip jatyr. Bul týraly búgin QR Ortalyq kommýnıkatsııalar qyzmetindegi brıfıngte QR Qarýly Kúshteri Bas shtabynyń Uıymdastyrý-jumyldyrý jumystary departamenti basshysynyń orynbasary Jınaqtaý basqarmasynyń basshysy, polkovnık Amantaı Úserbaev málim etti, dep habarlaıdy QazAqparat.

«Elimizdiń barlyq óńirlerinde azamattardy merzimdi áskerı qyzmetke shaqyrý jumystary uıymdasqan, júıeli júrgizilip jatyr. Osy jumystardy uıymdastyrý úshin barlyq óńirlerde áskerı qyzmetke shaqyrý komıssııasy jáne dárigerlik komıssııa qurylǵan, jumystar júrgizilýde. Osy kóktemgi ýaqytta Qazaqstan Qarýly kúshteriniń  qataryna 16 myńdaı azamat áskerı qyzmetke shaqyrylady»,-  dedi ol.

Onyń atap ótýinshe, kóktemgi merzimdi áskerı qyzmetke shaqyrý naýqany barysyndaǵy negizgi mindet QR Qarýly kúshterin, basqa da áskerleri men áskerı qurylymdaryn tıisti bilimi bar, fızıkalyq jáne psıhologııalyq turǵyda daıyndalǵan jas sarbazdarmen jasaqtaý bolyp otyr.

Brıfıng barysynda QR Qarýly Kúshteri Bas shtaby Uıymdastyrý-jumyldyrý jumystary departamentiniń basshysy, general-maıor Múslim Daıyrov kóktemgi áskerge shaqyrý Qazaqstan Qarýly kúshteriniń 25 jyldyq mereıtoıyna sáıkes kelip otyrǵandyǵyn atap ótti.

«Osyǵan baılanysty respýblıkada qoǵamdy qatystyra otyryp, áskerge shaqyrylǵandardy saltanatty jaǵdaıda shyǵaryp salý, ant berý rásimin ashyq alańdarda ótkizý júrgiziledi. Mundaı áskerı patrıottyq jumystar jas urpaqtyń óz Otanyn qorǵaýǵa  ázirligin shyńdaýǵa yqpal etedi», - dedi ol.