Qazaqstan «Armııa oıyndary - 2016» saıysyn ótkizýge daıyndalyp jatyr

ASTANA. QazAqparat - 2016 jyly Qazaqstan alǵash ret óziniń aýmaǵynda Armııa halyqaralyq oıyndary - 2016 jarysyna qatysatyn ózge elderdiń áskerı qyzmetshilerin qabyldaıdy, dep habarlaıdy QR Qorǵanys mnıstrliginiń baspasóz qyzmetinen.

«Aǵymdaǵy jyly respýblıkamyzdyń aýmaǵynda Armııa oıyndaryn ótkizý josparlanýda. 2016 jylǵy tamyzdyń 2-i men 9-y aralyǵynda Jambyl oblysy Qordaı aýdanynyń «Gvardeısk» oqý-jattyǵý polıgonynyń bazasynda «Artıllerııalyq oq atý sheberleri» jáne «Mergen shebi» baıqaýlary ótedi. 1 shildede polıgondar, oqý oryndary, áskerı qyzmetshilerdiń turatyn jerleri, ıaǵnı, atalmysh baıqaýdy laıyqty ótkizýimiz úshin barlyǵy daıyn bolýyna tapsyrma berildi», - dedi QR QK Bas shtaby Jaýyngerlik daıarlyq departamentiniń bastyǵy polkovnık Tımýr Ábishev.
Saıystyń ótkizilý ornynda ıreleń jol, mına-jarylǵysh qorshaý, oba, sirleý kópiri ispetti kedergileri bar uzyndyǵy 2 shaqyrymdyq artıllerııashylardyń baıqaýyn, sondaı-aq mergendik vıntovkadan, tapanshadan oq atý jáne granata laqtyrý úshin barlaýshynyń soqpaq joly men shebiniń elementteri bar mergender baıqaýyn ótkizý úshin tas jol salý josparlanǵan.
Búgingi kúni 7 eldiń, ıaǵnı, Ázirbaıjan, Armenııa, Belarýs, Venesýela, Reseı Federatsııasy, Qytaı jáne Qazaqstannyń áskerı qyzmetshileri ózderiniń qatysatynyn rastady.
Ótken jyly tuńǵysh Armııa halyqaralyq oıyndary - 2015 dodasy ótkizilgenin esterińizge sala keteıik.
QR Qarýly Kúshteriniiń áskerı qyzmetshileri úsh baıqaýǵa qatysty. Jarys qorytyndysy boıynsha olar «Avıadarts» pen «Kaspıı teńizinde» ekinshi oryndy enshilese, «Tank bıatlonynda» tórtinshi oryndy ıelendi.