Qazaqstan arqyly ótetin júkter qaı jerde uzaq bógeledi

ASTANA. QazAqparat - QR Premer-Mınıstriniń birinshi orynbasary Asqar Mamın konteınerlik tranzıtti ózge elderde uıymdastyrý máselesine basa nazar aýdardy. Sebebi júkter Qazaqstan arqyly jyldam ótse de, kórshi jatqan memleketterde bógelip qalady. Sonyń saldarynan konteınerlik tasymaldyń merzimi uzaryp, tıimdiligi tómendeıdi, dep xabarlaıdy QazAqparat tilshisi.

«Qazaqstan temir joly» aldyna úlken mindet qoıylyp otyr. 2020 jylǵa deıin konteınerlik tasymaldy 2 mıllıonǵa deıin jetkizý kerek. Bul - óte úlken kórsetkish. Esterińizde bolsa, 2011 jylda Qytaı-Eýropa baǵytynda konteınerlik tasymaldyń kólemi shamamen 1 myń dana boldy. Bıyl biz atalǵan kórsetkishti 400 myńǵa jetkizemiz dep otyrmyz», - dedi A.Mamın otandyq kólik-logıstıka keshenin damytý máselelerine arnalǵan respýblıkalyq keńeste.

Osy oraıda Úkimet basshysynyń orynbasary ortaq marshrýtta jatqan áriptes-memleketterdiń konteınerlerdi qanshalyqty jyldam ótkizip jatqanyn surady. Sebebi ótken jyly Polsha jerinde biraz kidiris baıqalǵan.

«Qazaqstan temir joly» ulttyq kompanııasynyń basshysy Qanat Alpysbaevtyń aıtýynsha, konteınerlerdi Belarýs jáne Polsha arqyly ótkizý kezinde birqatar máseleler bar.

«Osyǵan baılanysty Birikken kólik-logıstıka kompanııasy eki eldiń arasynda qosymsha shekara beketteri boıynsha jumys jasap jatyr. Budan bólek, Baltyq jaǵalýynyń ınfraqurylymyn, naqty aıtsaq, Kalınıngrad, Klaıpeda, Rıga sııaqty qalalardyń porttaryn paıdalanyp, qazirgi marshrýttardy ártaraptandyrý máselesi qaralyp jatyr», - deıdi Q.Alpysbaev.

Asqar Mamın Túrkimenstan men Iran arasyndaǵy ótkizý beketin de eske aldy. "Sol jerde konteınerler tasymaly bógeletin. Qazir jaǵdaı qalaı bolyp jatyr?", - dep surady ol. "QTJ" basshysynyń sózine qaraǵanda, Irannyń Gorgan qalasynda Qazaqstannyń jeke termınalyn salý qajet. Sonda júk tasymalyn eshbir qıyndyqsyz júrgizýge bolady.

«Sosyn ótken jyly Grýzııa men Túrkııa arasynda ótkizý beketi ashylǵan bolatyn. Bilýimizshe, ol jerde de birqatar qıyndyqtar bar dep estidik. Sebebi bir memleketten ekinshi memleketke kirgende temir joldyń eni ózgeredi. Sonda tabandy aýystyrýǵa kelgende grýzın jaǵynyń tájirıbesi azdaý kórinedi. Áriptesterimizge kómektesetin shyǵarmyz. Bálkim, birlesken kompanııany quryp, sol jerdegi jumysty jyldam uıymdastyramyz ba, qaıtemiz?", - dedi A.Mamın.

«QTJ» basshysy Qanat Alpysbaevtyń aıtýynsha, atalǵan másele tıisti mekemelerdiń deńgeıinde talqylandy. Eki túrli joldyń túıisken jerine mamandar da baryp qaıtty.

«Biz óz tarapymyzdan atalǵan beketti «Qazaqstan temir joly» kompanııasynyń basqarýyna berý týraly usynysty berdik. Sebebi, shynymen de, áriptesterimizdiń tabandy aýystyrý salasynda tájirıbesi azdaý bolyp tur. Menińshe, birinshi toqsannyń aıaǵyna deıin barlyq máselelerdi pysyqtaıtyn bolamyz», - dep atap kórsetti Q.Alpysbaev.