Qazaqstan arqyly ótetin tranzıttik júktiń bir bóligi temirjolǵa aýystyrylady
QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda osyndaı málimet aıtty.
«Qazir álem elderi júkterdi konteıner arqyly tasymaldaýǵa qarqyndy kóshýde. Atalǵan baǵytty iske asyrý úshin mnıstrlik «Qazaqstan temir joly» ulttyq kompanııasymen birlesip tasymal naryǵyna muqııat taldaý júrgizdi. Eksporttyq júkterdi konteınerleýdiń boljamdy kólemi jáne konteınerlerge qajettilik aıqyndaldy. Bastapqy kezeńde 2 mln tonna júkti konteınerlendirý josparlanyp otyr. Qytaımen shekaradaǵy karantındik shekteýlerge baılanysty elimizdiń negizgi kásiporyndary - ArselorMıttal, ERG, Qazmyrysh, Qazhrom, Qazmınerals jáne YDD óz júkterin konteınerleýge qyzyǵýshylyq bildirdi», -dedi mınıstr.
Onyń aıtýyna qaraǵanda, «Qazaqstan temir joly», Istkomtrans jáne Fesco kólik kompanııalary konteınerlik park qurý máselesin qarastyrýda.
«Serııalyq óndiristi 2022 jyldyń jeltoqsanynda júzege asyryp, jylyna 10 myń konteınerge deıin óndirý josparlanyp otyr. Máselen, «Qazaqstan Injınırıng», KLMZ «Meıker», SMP Group jáne FESCO otandyq zaýyttary bazasynda 20 jáne 40 fýttyq konteınerler, sondaı-aq rýlondy bolat pen ken júkterine arnalǵan konteınerler óndirisin jolǵa qoıý jumysy júrgizilýde.
«Ónerkásipti damytý qory» otandyq konteınerlerdi óndirýshiler men satyp alýshylar úshin jeńildikpen kredıt berý tetigin iske qosady.
Jalpy, 22 mln. tonna eksporttyq júkti, konteınerlerge qaıta baǵdarlaý kózdelýde. Bul, óz kezeginde qosymsha 117 myńǵa jýyq konteınerdi qajet etedi.
Otandyq óndiristi jolǵa qoıý, konteınerlerdiń jetkilikti parkin qalyptastyrýǵa, tasymaldardy konteınerleý úlesin 30%-ǵa deıin arttyrýǵa múmkindik beredi», - dedi Qaıyrbek Óskenbaev.