Qazaqstan arqyly ótetin tranzıttik tasymal kólemi 35 paıyzǵa ósti
10:14, 10 Qarasha 2020
NUR-SULTAN. QazAqparat – Pandemııanyń kólik salasyna keri áser etkenine qaramastan elimiz arqyly ótetin konteınerlerdiń tranzıttik tasymaly 35 paıyzǵa artqan. Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda osyndaı aqparatpen bólisti, dep habarlaıdy QazAqparat tilshisi.
«Kólik salasynda naqty kólem ındeksi 2020 jyldyń 10 aıynda 82,7% paıyzdy qurady. Pandemııanyń kólik salasyna teris áserine qaramastan, jekelegen baǵyttarda ósim bar. Atap aıtqanda konteınerlerdiń tranzıt tasymaly ótken jyldyń osy kezeńimen salystyrǵanda 35,4% paıyzǵa artyp, 718,6 myń jıyrma fýnttyq balamany qurady. 2019 jyldyń qańtar–qazan bul kórsetkish 530,8 myń jıyrma fýnttyq balama edi», - deıdi Beıbit Atamqulov.
Onyń aıtýynsha kóliktiń barlyq túrimen júk tasymaldaý kólemi 3,2 mlrd tonnany nemese ótken jylmen salystyrǵanda 92,9% paıyzdy qurap otyr.