Qazaqstan arqyly esirtki alyp ótpek bolǵan Grýzııa azamaty 11,5 jylǵa sottaldy

ShYMKENT. QazAqparat - Psıhotroptyq zattardy alyp ótpek bolǵan Grýzııa azamaty sottaldy, dep habarlaıdy QazAqparat Qarjy monıtorıngi komıtetine silteme jasap.

Shymkent qalasynyń qylmystyq ister jónindegi mamandandyrylǵan aýdanaralyq sotynyń úkimine sáıkes, Grýzııa azamaty QR QK 286-babynyń 4-bólimi jáne 296-babynyń 4-bólimi boıynsha kináli dep tanylyp, 11,5 jylǵa bas bostandyǵynan aıyryldy.

«QR QM Qarjy monıtorıngi komıteti osy tulǵanyń Qazaqstan Respýblıkasynyń memlekettik shekarasynan úlken kólemde zańsyz psıhotroptyq zattardy, atap aıtqanda metılendıoksımetamfetamın (MDMA, ekstazı) dárisin óziniń jeke paıdalanýy úshin alyp ótpek bolǵanyn anyqtady. «Frankfýrt-Máskeý-Shymkent» áýe reısine tirkeý kezinde atalǵan azamattyń rásemdeý úshin tapsyrylǵan júginen zańsyz 6 dana ekstazı dárisi tabyldy» delingen habarlamada.

Tárkilengen esirtki joıylyp, Grýzııa azamatyna qatysty sot úkimi kúshine endi.