Qazaqstan Araldy qutqarýǵa arnalǵan jobalardy qoldaýǵa ázir - Gúlshara Ábdiqalyqova

ASTANA. QazAqparat - QR Memlekettik hatshysy Gúlshara Ábdiqalyqova Túrikmenstannyń Qazaqstandaǵy Tótenshe jáne Ókiletti elshisi Toıly Kómekovpen kezdesti, dep habarlaıdy QazAqparat tilshisi.

Kezdesý kezinde G.Ábdiqalyqova eki eldiń arasyndaǵy baılanystardyń kúsheıip kele jatqanyn aıryqsha atap ótti. Oǵan Qazaqstan men Túrikmenstan prezıdentteriniń qarym-qatynasy serpin berip otyr. «Ótken jyly prezıdentterińiz Qazaqstanǵa memlekettik saparmen kelip ketti. Sol kezde ondaǵan kelisim rásimdeldi. Atalǵan qujattardyń ishinde strategııalyq áriptestik týraly kelisim de bar. Eki eldiń basshylary aýqymdy ári batyl maqsattardy qoıdy. Atap aıtqanda, ózara taýar aınalymyn barynsha arttyrý qajet. Sondyqtan atqarylatyn jumys kóp», - dedi G.Ábdihalyqova.

Memlekettik hatshy Araldy qutqarý qorynyń jumysyna da toqtaldy. Sebebi atalǵan uıymnyń tóraǵalyǵy Túrikmenstan memleketine tapsyrylǵan bolatyn. «Osy oraıda birqatar mańyzdy jobalar bar. Biz onyń barlyǵyn qoldaýǵa daıynbyz. Jalpy, biz tyǵyz qarym-qatynas jasaýǵa múddeli bolyp otyrmyz. Qazir bizdiń elimizde mańyzdy bir kezeń bastaldy. Úlken reformalar qolǵa alynyp jatyr. Ekonomıka jaǵynan da, saıasat jaǵynan ózgerister kóp. Árıne, áleýmettik sala da nazardan tys qalmady. Siz Prezıdentimizdiń bes áleýmettik bastamasy jaıynda estigen shyǵarsyz. Onyń ishinde baspanamen qamtý, bilim berý, shaǵyn nesıeni kóbeıtý, gazben qamtý sııaqty mańyzdy máseleler bar. Sonyń barlyǵyn iske asyrǵanda birlesip jumys isteýge ázirmiz», - dep atap kórsetti G.Ábdihalyqova.

Aıta keteıik, ótken jyly Qazaqstan men Túrikmenstan arasyndaǵy taýar aınalymy 99,3 mıllıon dollardy qurady.