Qazaqstan AÓSShK protsesin aryqaraı ilgeriletedi

ASTANA. QazAqparat – Qazaqstan AÓSShK protsesin odan ary ilgeriletedi. Bul týraly Azııadaǵy ózara is-qımyl jáne senim sharalary jónindegi keńestiń VI sammıtinde sóz sóılegen Memleket basshysy Qasym-Jomart Toqaev málimdedi, dep habarlaıdy QazAqparat tilshisi.

«Qazaqstan keńestiń tóraǵasy retinde AÓSShK protsesin odan ári ilgeriletý boıynsha kúsh-jigerdi arttyrýǵa nıetti. Múshe memleketterdiń qoldaýynyń arqasynda bul aıtarlyqtaı nátıje berdi. Ótken jylǵy AÓSShK senim sharalarynyń katalogy qaıta qaraldy», - dep atap ótti Memleket basshysy.

QR Prezıdentiniń dereginshe, senim sharalarynyń katalogyna epıdemıologııalyq qaýipsizdik, densaýlyq saqtaý jáne farmatsevtıka, aqparattyq jáne kommýnıkatsııalyq tehnologııalar qaýipsizdigi sııaqty yntymaqtastyqtyń jańa basym baǵyttary engizilgen.

«Biz keńesshi organ – AÓSShK danyshpandar keńesin qurdyq. Onyń quramyna bizdiń birlesken kúsh-jigerimizdi júzege asyrýǵa yqpal etetin baı tájirıbesi men bilimi bar kórnekti saıası jáne qoǵam qaıratkerleri kiredi», - dedi Qasym-Jomart Toqaev.