Qazaqstan Antıkory men AQSh Memlekettik departamenti aktıvterdi qaıtarý máselelerin talqylady

<p>Qazaqstan Sybaılas jemqorlyqqa qarsy is-qımyl agenttigi Amerıka Qurama Shtattaryndaǵy áriptesterimen jemqorlyqqa qarsy kún tártibi boıynsha yntymaqtastyq máselelerin talqylady, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiktiń baspasóz qyzmetine silteme jasap.&nbsp;</p>

Agenttik tóraǵasy Ashat Jumaǵalı AQSh Memlekettik departamentiniń Esirtkimen halyqaralyq baılanystar jáne quqyq qorǵaý organdary bıýrosynyń keńesshisi, Azııa aımaǵynda baǵdarlamalar men jobalardy engizý salasyndaǵy sarapshy Kaıl Odjımamen kezdesti. Ashat Jumaǵalı agenttiktiń qyzmeti jáne júrgizilip jatqan reformalar týraly habardar etip, sondaı-aq amerıkalyq taraptyń jemqorlyqqa qarsy jobalardy iske asyrýda jáne ilgeriletýde kórsetip otyrǵan qoldaýynyń mańyzyn atap ótti.

Taraptar ekijaqty yntymaqtastyq máselelerin talqylap, qarjylyq tergeý, aktıvterdi qaıtarý, tsıfrlyq qarjy aktıvterin, krıptobırjalardy jáne basqa da tsıfrlyq platformalardy paıdalana otyryp jasalǵan jemqorlyq qylmystarǵa qarsy is-qımyl máseleleri boıynsha birlesken is-sharalar ótkizý týraly ýaǵdalasty.

Kaıl Odjıma seriktestik qatynastardy odan ári damytýǵa qyzyǵýshylyq tanytyp, qol jetkizilgen kelisimderdi iske asyrýda jan-jaqty kómek kórsetýge daıyn ekenin bildirdi. Kezdesý sońynda amerıkalyq tarap agenttik delegatsııasyn Amerıka Qurama Shtattarynda jeltoqsanynda ótetin BUU Sybaılas jemqorlyqqa qarsy konventsııasyna qatysýshy memleketter konferentsııasynyń mereıtoılyq sessııasyna qatysýǵa shaqyrdy.