Qazaqstan Altyn ordany jekeshelendirip alýdy oılap otyrǵan joq - tarıhshy

NUR-SULTAN. QazAqparat – Altyn ordanyń Qazaqstan úshin mańyzy qandaı? Bul suraqqa Álemdik ekonomıka jáne saıasat ınstıtýtynyń «Іshki saıası, gýmanıtarlyq jáne medıa zertteýler» baǵdarlamasynyń bas sarapshysy Radık Temirǵalıev taldaý jasaı otyryp, jaýap berdi, dep habarlaıdy QazAqparat tilshisi.

«Altyn orda Qazaqstanǵa nesimen mańyzdy? Birinshiden, tarıhtyń mańyzdy bóliginiń kóleńkede qalyp qoıýy – bizdiń tarıhty tutastyǵynan aıyrady. Bylaısha aıtqanda, ata-babamyzdyń eki ǵasyrlyq tarıhyn shetke ysyryp, Qarahan áýletinen nemese Qypshaq handyǵynan birden Qazaq handyǵyna sekirip túse almaımyz. ıAǵnı, olaı etý Qytaı tarıhyn Tań dınastııasynsyz nemese Reseıdi Rıýrıkovıch kezeńinen bólip qarastyrýmen birdeı. Bulaı etsek, tarıh logıkasy qurdymǵa ketip, tarıhı protsestegi baılanysty úzip alamyz», - dedi Radık Temirǵalıev elordada ótken «Altyn orda. Tarıh pen taǵylym» atty dóńgelek ústelde.

Sarapshy Altyn ordanyń tarıhyn tolyǵymen zerttep almaı, Qazaq handyǵyn taný múmkin emes ekenin aıtty.

«Ekinshiden, qazaqstandyq qoǵam Altyn ordasyz óziniń sımvolıkalyq kapıtalynyń mańyzdy bóligin joǵaltyp alady. Ártúrli zertteý jumystary qoǵam men jeke tulǵanyń damýyna qanshalyqty áser etkenin, psıhologııalyq yqpaly bolatynyn dáleldegen. Qysqasha aıtqanda, myǵym ári ekonomıkasy damyǵan, mádenıeti baı, áskerı-saıası derjavanyń negizin qalaǵan babalarymyzdyń úlgisi qazirgi qoǵamnyń ambıtsııasyna qoǵamdyq áserin tıgizedi. Ózińe degen senim joq bolsa, eshqandaı asýdy ala almaıtynyńyz anyq. Bul rette Altyn ordanyń tarıhy halyqtyń rýhyn jańǵyrtyp, qazaq patrıotızmin bekemdeýde mańyzdy ról atqarady», - dedi Radık Temirǵalıev.

Tarıhshynyń sózinshe, Qazaqstan Altyn ordanyń qandaı da bir murasyn jekeshelendirip alýdy oılap otyrǵan joq.

«Bul – túrki halyqtarynyń ortaq murasy. Atalǵan tarıhı kezeńdi zertteýde Tatarstan ǵalymdarynyń qanshalyqty úles qosqanyn bilemiz. Bir-birimizben etene jumys júrgizýdiń arqasynda ǵana biz Altyn ordaǵa álemdik tarıhta laıyqty oryn bere alamyz», - deıdi sarapshy.

Eske sala ketsek, búgin elordada «Altyn orda. Tarıh pen taǵylym» atty dóńgelek ústeli ótip, Altyn orda tarıhyna qatysty tatarstandyq tarıh ǵylymynyń doktory, etnograf Damır Iskakov, Túrki akademııasynyń sarapshysy, fılologııa ǵylymdarynyń kandıdaty Tımýr Kozyrev, tarıh ǵylymynyń doktory, QR BǴM Memleket tarıhy ınstıtýtynyń dırektory Búrkit Aıaǵan pikir bildirgen edi.