Qazaqstan alǵash ret Qytaıǵa atom elektr stantsııasyna arnalǵan ıadrolyq otyn jetkizdi
Jetkizilgen AFA 3G TM dızaınyndaǵy jańa ıadrolyq otyn jylý bóletin qurama (JBQ) dep atalady. Otyn «Úlbi-JBQ» JShS zaýytynda shyǵaryldy, ol Qazaqstan men Qytaıdyń birlesken kásiporny.
Bir qaıta júkteý kólemindegi (30 tonnadan astam tómen baıytylǵan ýran) JBQ ornalastyrylǵan 34 kóliktik-oraý konteıneri bar temirjol platformalary mamandandyrylǵan kúzetpen birge Qytaıdaǵy atom elektr stantsııasyna jetkizilip, túpki tutynýshy – Qytaıdyń CGNPC-URC ıadrolyq korporatsııasyna tabystaldy.
«AES úshin ıadrolyq otyn óndirý jónindegi ınnovatsııalyq jobany iske asyrý – Kompanııanyń álemdik klımattyń ózgerýiniń saldaryn jumsartýǵa jáne tómen kómirtekti damý jónindegi jahandyq maqsatqa qol jetkizýge qosqan úlesiniń mysaly. «Úlbi-JBQ» zaýyty Qazatomónerkásipke óndiristi ártaraptandyrýǵa, jelini keńeıtýge jáne qosylǵan quny joǵary joǵary tehnologııalyq, eksportqa baǵdarlanǵan ýran ónimderin shyǵarýǵa múmkindik berdi. Qytaılyq seriktesterge ónimdi sátti jetkizý Qazatomónerkásiptiń álemdik ıadrolyq otyn naryǵynda senimdi jáne artyqshylyqqa ıe jetkizýshi retindegi bedelin rastady», - dedi Qazatomónerkásip UAK» AQ Basqarma tóraǵasy Erjan Muqanov.
Joba atom ónerkásibi salasyndaǵy álemniń jetekshi kompanııalarynyń tabysty kópjaqty yntymaqtastyǵynyń jaqsy úlgisi bolyp tabylady. JBQ óndirisinde Úlbi metallýrgııa zaýytynda qaıta óńdelgen Qazaqstanda óndirilgen ýran shıkizaty paıdalanylady.
«Úlbi-JBQ» JShS zaýytynyń ujymyn jáne Qytaıdan kelgen seriktesterimizdi osy orasan zor oqıǵamen quttyqtaımyn. Daıyn ónimdi alǵashqy jóneltý JBQ turaqty jetkizilimderiniń bastalýyn belgiledi, bul bizdiń kásiporyndar úshin ǵana emes, sonymen qatar Qazaqstan men Qytaı úshin beıbit atomdy ıgerýde óte mańyzdy», - dedi «ÚMZ» AQ Basqarma tóraǵasy Sergeı Bejetskıı.
«Men daıyn ónimdi óndirýge jáne tutynýshy – Qytaı Halyq Respýblıkasyna alǵashqy jetkizýge qatysqan barlyq áriptesterime alǵys aıtqym keledi. Túpki tutynýshy ókilderiniń qatysýymen «Úlbi-JBQ» JShS, «ÚMZ» AQ jáne URC-Logistics qyzmetkerleri komandasynyń úılesimdi jumysy tarıhı oqıǵany júzege asyrýǵa kómektesti», - dep atap ótti «Úlbi-JBQ» JShS Bas dırektory Arman Súleımenov.
«Úlbi-JBQ» JShS zaýyty 2021 jyldyń qarasha aıynda Framatome frantsýz kompanııasynyń AFA 3G dızaınyndaǵy JBQ óndirý tehnologııasynyń ıesi tarapynan sertıfıkattaýdan ótkennen keıin jáne ónimniń túpkilikti tutynýshysy – CGNPC-URC Qytaı ıadrolyq korporatsııasy tarapynan sertıfıkattalǵan ıadrolyq otyn jetkizýshisi retinde tanylǵannan keıin iske qosyldy. Bul atom elektr stantsııalary úshin ıadrolyq otyn shyǵarý boıynsha Qazaqstan Respýblıkasyndaǵy jalǵyz óndiris jáne 20 jyl buryn kepildi ótkizý naryǵy bar. Zaýyttyń qýaty – tómen baıytylǵan ýranǵa eseptegende jylyna 200 tonna.
«Qazatomónerkásip» UAK» AQ ınnovatsııalyq óndirisiniń iske qosylýy Qazaqstanǵa atom stantsııalary úshin ıadrolyq otyn óndirýshi jáne jetkizýshi memleketterdiń shekteýli sheńberine kirýge múmkindik berip, Qazaqstan Respýblıkasynyń atom salasyn damytý jáne osy baǵyttaǵy basqa eldermen yntymaqtastyq perspektıvalary boıynsha jańa múmkindikter ashty.
Aıta keteıik, JBQ – ınjenerlik qurylym, onyń jaqtaýyna jylý bóletin elementter (tvelder) – ýran tabletkalarymen toltyrylǵan tútikter ornalastyrylady. Bul quramalar AES úshin otyn bolyp tabylady. TBelderge arnalǵan ýran tabletkalaryn «ÚMZ» AQ daıyndaıdy.
Foto:kazatomprom.kz