Qazaqstan Áleýmettik qamsyzdandyrýdyń búkilálemdik forýmyn ótkizýdi usynady - G.Ábdiqalyqova

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Halyqaralyq áleýmettik qamsyzdandyrý qaýymdastyǵynyń bas hatshysy Hans-Horst Konkolevskımen kezdesti. Sonymen qatar kezdesýge QR Eńbek jáne halyqty áleýmettik qorǵaý mınıstri Tamara Dúısenova qatysty, dep habarlaıdy QazAqparat.

Júzdesý barysynda Gúlshara Ábdiqalyqova halyqty áleýmettik qorǵaý salasyndaǵy biryńǵaı álemdik saıasatty júzege asyrý isinde HÁQQ-nyń mańyzdy ról atqaratyndyǵyn basa aıtty. Sonymen birge Qazaqstan 2012 jyldan beri HÁQQ-nyń múshesi bola otyryp, qaýymdastyqtyń maqsattaryna qoldaý kórsetip kele jatqandyǵyn jáne áleýmettik qamsyzdandyrý júıesin jetildirý baǵytynda birlese jumys júrgizýge múddeli ekendigin atap ótti.

«Qazaqstannyń áleýmettik qorǵaý júıesine aıryqsha kóńil aýdarǵanyńyz úshin rızashylyǵymdy bildiremin. HÁQQ-men yntymaqtastyqty jolǵa qoıǵanymyzǵa 5 jyl tolady. Siz halyqty áleýmettik qorǵaýdyń úsh deńgeıli júıesin qurýǵa kómek berdińiz. Qazirgi ýaqytta júıe tıimdi jumys istep tur dep aıtýǵa bolady», - dedi ol.

Memlekettik hatshy 2030 jylǵa deıin Qazaqstannyń áleýmettik damý tujyrymdamasynda belgilengen halyqty áleýmettik qorǵaý salasyndaǵy saıasaty kezeń-kezeńimen júrgizilip kele jatqandyǵyn eske saldy.