Qazaqstan álemniń 30 eline munaı jóneltedi - U.Qarabalın

ASTANA. QazAqparat- Qazaqstan álemniń 30 eline munaı jóneltedi. Bul týraly búgin Parlament Májilisindegi Úkimet saǵatynda QR Munaı jáne gaz mınıstri Uzaqbaı Qarabalın málim etti.

«Qazaqstan álemniń 30 eline munaı jóneltedi. 2013 jylǵy málimetter boıynsha eksporttyń eń mol kólemi Italııaǵa - 27, Qytaıǵa- 17, Nıderlandyǵa - 13, Frantsııaǵa - 9, Avstrııaǵa 7 paıyz jiberildi», - dedi ol.

Sonymen qatar mınıstrdiń atap ótýinshe, ótken jyly munaı tasymaldaý Kaspıı qubyr konsortsıýmy boıynsha 28,7 mln. tonnany, Atyraý-Samara baǵytynda 15,4 mln. tonnany, Atasý-Alashańqaı baǵytynda 11,8 mln. tonnany qurady, Aqtaý porty arqyly 6,3 mln.tonna munaı tasymaldandy. Orynbor gaz óndirý zaýytyna 856 myń tonna gaz kondensaty joneltildi. Taǵy 9 mln. tonna temir jolmen jiberildi. «Ótken jylǵy mańyzdy oqıǵalardyń biri Atasý-Alashańqaı baǵytyn jıyrma mln. tonnaǵa deıin keńeıtý boldy. Ol ýchaskeniń eksporttyq qýatyn eki esege arttyrýǵa múmkindik beredi», - dedi U.Qarabalın.