Qazaqstan álemdik ǵarysh qaýymdastyǵynyń tolyqqandy múshesi atanýǵa nıetti - mınıstr

NUR-SULTAN. QazAqparat - Qazaqstannyń ǵarysh salasynyń qazirgi jaǵdaıy, damý múmkindikteri, jańa aeroǵaryshtyq tehnologııalardy engizýi, Baıqońyrdaǵy tarıhı ózgerister «Qazaqstandaǵy ǵarysh kúnderi: Baıqońyr – álemdik ǵarysh besigi» atty halyqaralyq forýmda keńinen talqylanyp jatyr. Bul jóninde QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmetine silteme jasap QazAqparat habarlaıdy.

Nur-Sultan qalasynda osymen jetinshi ret uıymdastyrylǵan forým alańynda álemniń 25 elinen kelgen ǵarysh salasynyń 650-den astam sarapshysy bas qosty. QR Premer-Mınıstri Asqar Mamınniń qatysýymen ótken forýmnyń plenarlyq bóliminde Qazaqstannyń ǵarysh júıesiniń jetistikteri men perspektıvalary áńgime boldy.

Qazaqstannyń ǵarysh salasyndaǵy basty jańalyqtardyń biri retinde ǵarysh apparattaryn qurastyrý-synaý kesheni qurylysynyń aıaqtalǵany týraly aktige qol qoıylǵanyn aıtýǵa bolady. QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıevtiń aıtýynsha, bul keshen otandyq ǵarysh salasyn sapaly jańa deńgeıge kótermek.

«Búgingi kúni Qazaqstanda eki telekommýnıkatsııalyq spýtnık jumys isteıdi. Biz osy saladaǵy múmkindikterimizdi odan ári damytýdy kózdeýdemiz. Keshe ǵana qurastyrý-synaý kesheniniń qurylysy aıaqtaldy, ıaǵnı 2020 jyly biz óz spýtnıgimizdiń jobasyn jasap, óndirýge kirisý arqyly jańa deńgeıge kóterilýdi josparlap otyrmyz. Bul - Qazaqstannyń álemdik ǵarysh qaýymdastyǵynyń tolyqqandy múshesi retindegi bastamasy», - dep atap ótti mınıstr.

Asqar Jumaǵalıev forýmǵa qatysyp otyrǵan Qazaqstannyń strategııalyq seriktesterine, atap aıtqanda, «Roskosmos» MK, Airbus, Azııa-Tynyq muhıty ǵarysh yntymaqtastyǵy uıymy, OneWeb, Euroconsult basshylyǵyna alǵysyn bildirip, birlesken jobalardy odan ári júzege asyrýǵa daıyn ekendigin jetkizdi.

Budan basqa, Asqar Jumaǵalıev álemdik ǵarysh salasyndaǵy sarapshylarmen ekijaqty kezdesýler barysynda tıimdi «ǵaryshtyq» yntymaqtastyq máselelerin talqylady.

Forýmdaǵy negizgi talqylaýlar «Baıqońyr ǵarysh aılaǵyn damytý», «Ǵaryshtan JDZ jáne spýtnıktik navıgatsııa tehnologııalary», «Spýtnıktik baılanystyń bolashaǵy» baǵyttary boıynsha ótýde. Osy oraıda forýmnyń dúnıejúzilik ǵarysh qyzmetiniń jetistikterimen bólisip, ozyq tájirıbelermen almasýda jáne otandyq ǵarysh salasyn nasıhattaýda biregeı alańǵa aınalǵanyn aıtyp ótken jón.

Forýmǵa mınıstrliktiń strategııalyq seriktesteri - Roskosmos, «Airbus Defence and Space» sondaı-aq, otandyq jáne sheteldik uıymdar qatysýda, olardyń ishinde: «M.V. Hrýnıchev atyndaǵy memlekettik ǵaryshtyq ǵylymı-óndiristik ortalyǵy», «M.F. Reshetnev atyndaǵy ASJ» AQ, «Transtelekom»AQ, One Web, SES, «Leica Geosystems, Satrec Initiative», «Eutelsat» BAÁ ǵarysh agenttigi, Ýkraınanyń memlekettik ǵarysh agenttigi, japondyq aeroǵaryshtyq zertteýler agenttigi, THALES ALENIA SPACE kompanııasy jáne taǵy basqalar bar.