Qazaqstan álemde munaı óndirisin retteıtin OPEK uıymynyń balamasyn qurýdy usyndy
KAZENERGY Eýrazııalyq forýmynda sóz alǵan QR Energetıka mınıstriniń birinshi orynbasary Uzaqbaı Qarabalın jahandaný úderisterdi men bir eldiń ekinshi elge yqpaly negizinen munaı arqyly júrgizilip otyrǵandyǵyn aıtty.
«Qazirgi ýaqytta qalyptasqan jaǵdaıǵa oraı, munaı óndirýshi elder men jahandyq ekonomıka suranystaryna saı qajetti munaı ónimderin jetkizýshi iri kompanııalar arasynda qazirgi zamanǵy suhbat alańyn qurý boıynsha kóp áńgime júrip jatyr. Ondaı suhbat alańy retindegi jumysty jańǵyrtylǵan OPEK nemese munaı óndirýshi elderdiń jańa uıymy atqara alar edi. Jekelegen múddelerdi alǵa tartýdy boldyrmaý úshin onyń qyzmetin BUU jáne ózge de iri uıymdarmen baılanystyrýǵa bolady», - dedi U. Qarabalın.
Onyń sózine qaraǵanda, uıymǵa táýligine 1-1,5 mln. barrel munaı óndiretin elder múshelik etedi jáne álemdi 80 paıyz munaımen qamtamasyz etip otyrǵan negizgi oıynshylardyń basyn qosatyn bolady.
«Ol tek meniń jeke pikirim ekenin aıtqym keledi. Árıne, ol kóp faktorlarǵa táýeldi is, biraq erteli-kesh álemdik munaı qaýymdastyǵynyń evolıýtsııasy osyndaı ózara túsinisýdiń jolyn tańdaıdy. Oǵan neǵurlym tez qol jetkize alatyn bolsaq, soǵurlym álemdik munaı salasy turaqtala túsedi», - dep atap ótti ol.