Qazaqstan AQSh tarapyn jasyl tehnologııalar ortalyǵyn qurýda qoldaý jasaýǵa shaqyrdy

ASTANA. QazAqparat - Qazaqstan BN-350 reaktoryn paıdalanýdan shyǵarý boıynsha AQSh-pen birlesken jumystardy jalǵastyrýǵa úmitti. Bul týraly búgin Astanada AQSh Energetıka mınıstriniń orynbasary Den Brýıllettpen bolǵan kezdesýden keıin QR Energetıka mınıstri Qanat Bozymbaev málim etti, dep habarlaıdy QazAqparat.

«Bul taqyryp bizdiń málimdemege engen joq, alaıda ony talqyladyq. Radıatsııalyq qaýipsizdikti qamtamasyz etý men taratpaý rejimin tereńdetý úshin BN-350 reaktoryn paıdalanýdan shyǵarý boıynsha birlesken jumystardy jalǵastyrýǵa úmit artamyz», - dedi Q. Bozymbaev.

Sonymen qatar mınıstr EKSPO bazasynda qurylyp jatqan Halyqaralyq «jasyl» tehnologııalardy damytý ortalyǵyn qoldaý men yntymaqtastyq múmkindikteri usynylatynyn jetkizdi.

«Budan bólek, búgingi kezdesý barysynda Amerıka Qurama Shtattary tarapynan Reseı Federatsııasyna qoıylatyn sanktsııalarǵa baılanysty shekteýler amerıkalyq jáne qazaqstandyq kapıtaldyń qatysýymen munaı-gaz jobalaryn tıimdi iske asyrýǵa áser etpeýi tıis degen pikirimdi bildirdim. Osy oraıdaǵy qadamdar tranzıttik munaı jáne gaz qubyrlary arqyly álemdik naryqtarǵa energııa resýrstaryn esh kedergisiz tasymaldaýǵa múmkindik beredi degen senimdemiz», - dedi Q.Bozymbaev.