Qazaqstan agrarlyq salada Qytaımen 160 mln dollardyń kelisimine qol qoımaq

ASTANA. QazAqparat - Qazaqstan men Qytaı agrarlyq salada 160 mln dollardyń kelisimshartyna qol qoıady. Bul týraly búgin  Qazaq-Qytaı agrarlyq-ınvestıtsııalyq forýmy aıasynda BAQ ókilderine suhbat bergen QR Aýyl sharýashylyǵy vıtse-mınıstri Gúlmıra Isaeva málim etti, dep habarlaıdy QazAqparat.

«Osy forýmnyń aıasynda jalpy quny 160 mln. dollardy quraıtyn 7 qujatqa qol qoıylady. Atalǵan qujattardyń ishinde 3 saýda kelisimi bar. Oǵan sáıkes bizdiń «Azyq-túli» korporatsııamyz 200 myń tonna astyq pen 100 myń tonna maıly daqyldar jetkizetin bolady. Sonymen qatar elderimiz arasyndaǵy shekaralyq aımaqta astyq pen maıly daqyldardy saqtaýǵa arnalǵan termınal qurylysy da bastalatyn bolady», - dedi vıtse-mınıstr.

Onyń aıtýynsha, bulardan bólek ǵylymı ınnovatsııa transferti salasyndaǵy yntymaqtastyqqa qatysty birqatar kelisim rásimdeledi. Atap aıtqanda, S.Seıfýllın atyndaǵy Qazaq agrotehnıkalyq ýnıversıetinde Agrarlyq park qurylady. Búgin bıoqaýipsizdik jónindegi zerthana qurylysynyń irgetasyn qalaý sharasy ótkiziledi. Ol birneshe kezeńmen júzege asyrylady. 

«Birinshi kezeńde qytaı tarabynan bólinetin granttyń esebinen zamanaýı veterınarlyq zerthana qurý júzege asyrylady. Onda aýyl sharýashylyǵy janýarlarynyń aýrýlaryna birlesken zertteýler júrgiziledi. Odan keıin dál osyndaı zerthana karantındik nysandar boıynsha qurylady. Osylaısha, aýyl sharýashylyǵynyń barlyq spektory qamtylmaq», - dedi Gúlmıra Isaeva.

Sonymen qatar vıtse-mınıstr Qytaıdan Qazaqstan jerine kóshiriletin 51 kásiporynnyń 6-aýy aýyl sharýashylyǵy ónimderin óńdeýge, al 4-eýi azyq-túlik salasynda bolatyndyǵyn atap ótti.  Kásiporyn jumystaryna qazaqstandyq jumys kúshi tartylady. Degenmen, kásiporyndardyń qural-jabdyqtaryn ornatý jumystaryna qytaılyqtarmen qatar sheteldik mamandar da keledi.