Qazaqstan adam quqyqtary boıynsha halyqaralyq mindettemelerine úlken jaýapkershilikpen qarap otyr - Q. Sultanov
Bul týraly búgin Astanada Halyqaralyq adam quqyqtary kúnine arnalǵan dóńgelek ústelde QR Prezıdenti janyndaǵy Adam quqyqtary jónindegi komıssııanyń tóraǵasy, QR Parlamenti Májilisiniń depýtaty Qýanysh Sultanov málim etti.
«Qazaqstan úshin adam jáne onyń ómiri, quqyqtary men bostandyqtary eń joǵary qundylyq bolyp tabylady. Bul týraly Ata Zańymyzdyń 1 babynda taıǵa tańba basqandaı naqty kórsetilgen. Aldymen sizderge gýmanıtarlyq ǵylym salasynda «Dala demokratııasy» degen atpen belgili bolǵan fenomendi erekshe atap ótip keledi. Óıtkeni, halyqtyń óz tarapynan saılap alǵan bılik ókilderi ózderine senip tapsyrylǵan ókilettikterin iske asyrarda árdaıym qarapaıym kóshpendilerdiń zańdy múddeleri men quqyqtaryn eskerip otyrǵan»,-dep toqtaldy depýtat elimizdegi ózge elderdiń dıplomattaryna qaratyp aıtqan sózinde.
Osy oraıda Q. Sultanov Qazaqstan Táýelsizdik alǵan sátten bastap adam quqyqtary men bostandyqtaryn qurmetteý, saqtaý men qorǵaýǵa mindetteme alyp, BUU-nyń belsendi múshesi retinde óziniń adam quqyqtary salasyndaǵy halyqaralyq mindettemelerine úlken jaýapkershilikpen qarap otyrǵandyǵyn qadap aıtty.
«Bıylǵy 28 qarashada Qazaqstan BUU-nyń Adam quqyqtary jónindegi keńesi bıýrosyna birýyzdan 2015 jylǵa múshe retinde saılanǵanyn estidińizder. Osyǵan oraı Qazaqstannyń Jenevadaǵy Turaqty ókili 2015 jyldyń 1 qańtarynan bastap BUU Adam quqyqtary jónindegi keńesi tóraǵasynyń orynbasary qyzmetine kirisetin bolady. Bul elimizdiń adam quqyqtaryn saqtaý men qorǵaýda jáne kótermeleýde atqarǵan jumystaryna oń baǵa bergen Birikken Ulttar Uıymynyń Adam quqyqtary jónindegi keńesine múshe memleketterdiń Qazaqstanǵa jáne Elbasyna kórsetken úlken senimi men qurmeti dep túsingenimiz jón»,-dep túıdi depýtat.
Dóńgelek ústelgen QR Memlekettik hatshysy Gúlshara Ábdiqalyqova, memlekettik organdar men úkimettik emes uıymdardyń, sondaı-aq Qazaqstandaǵy sheteldik elshilikterdiń ókilderi qatysty.