Qazaqstan Adam damý ındeksiniń jahandyq reıtıngisinde 69-orynda

ASTANA. 8 sáýir. QazAqparat - Búgin Syrtqy ister mınıstrliginde BUU Damý baǵdarlamasynyń «Ońtústiktiń órleýi: alýan túrli álemdegi adamı progress» atty ǵalamdyq baıandamasynyń aımaqtyq tusaýkeseri ótti. Sharaǵa Qazaqstan memlekettik organdarynyń, dıplomatııalyq korpýstyń jáne BUU júıesi agenttikteriniń ókilderi qatysty.

Adam damýy týraly jahandyq baıandama málimetterine qaraǵanda, 2012 jyly Qazaqstan Adam damý ındeksiniń reıtıngisinde 69-ynshy orynǵa turaqtady. 2011 jyly elimiz 68-inshi orynda turǵan bolatyn. Bunyń ózi atalmysh kórsetkishtegi Qazaqstannyń joǵary deńgeıdegi elder tobyna jatatynyn bildiredi.

Al jalpy baıandamaǵa kelsek, onda atalǵan reıtıngtegi joǵary topqa enetin kóptegen elderde 2000 jyldan bergi kezeń úshin Adam damý ındeksi turaqty ósip otyrǵany atalyp ótiledi. Onyń ishinde ındeksi joǵary toptaǵy elder qataryndaǵy Aljır, Qazaqstan, Iran, Venesýela men Kýba 12 jyldyq kezeń ishinde ındekstiń anaǵurlym joǵary ósimin qamtamasyz etken. 1995-2012 jyldar arasynda Adam damý ındeksindegi Qazaqstannyń kórsetkishi 0,642-den 0,754-ke deıin ulǵaıǵan.

Al BUU DB sarapshylarynyń pikirinshe, Qazaqstannyń Adam damý ındeksi aımaqtaǵy ósimniń eń joǵary qarqynyn kórsetip otyr. Bul ortasha alǵanda sońǵy 10 jyl ishinde jyldyq 1,1 paıyz kórsetkishti quraıdy.

Jalpy osy ındeks boıynsha Ortalyq Azııa elderine kelsek, Túrkimenstan - 102, Ózbekstan - 114, Qyrǵyzstan men Tájikstan - 125 oryndarda tur.