Qazaqstan 6 myńǵa jýyq týrısti elge qaıtarý úshin 19 charterlik reıs uıymdastyrdy

NUR-SULTAN. QazAqparat – Shet elderde júrgen 6 myńǵa jýyq qazaqstandyq týrısti elge qaıtarý úshin charterlik reıster uıymdastyrylyp jatyr, dep habarlaıdy QazAqparat.

Bul týraly QR Mádenıet jáne sport mınıstrligi týrızm ındýstrııasy komıtetiniń tóraǵasy mindetin atqarýshy Dastan Ryspekov aıtyp berdi.

18 naýryzdaǵy jaǵdaı boıynsha shetelde týrıstik opetorlar arqyly demalyp jatqan qazaqstandyqtar sany 5 914 adamdy quraǵan.

«Úsh kúnde olardy elge qaıtarý boıynsha 14 charterlik reıs jasalyp, 2 818 adam elge qaıtaryldy. Jalpy 18 naýryzdan 23 naýryzǵa deıin 19 charterlik reıs josparlanǵan. Endi 1022 týrısti qamtıtyn 5 reıs qalyp otyr. Búgin keshke jáne túnde 733 jolaýshyny ákeletin 4 reıs josparlanǵan», - dedi D. Ryspekov Ortalyq kommýnıkatsııalar qyzmetinde ótken brıfıngte.

Sonymen qatar, turaqty reıstermen 1879 adamnyń 1695-i Qazaqstanǵa qaıtyp keldi. Qazirgi ýaqytta sheteldegi 379 azamatty qaıtarý qaldy, onyń 319-i 23 naýryzǵa deıin Reseı arqyly tranzıtpen qaıtady.