Qazaqstan 41 elmen avtomobıl baılanysy boıynsha kelisim jasady - IDM
«Qazaqstannyń geografııalyq ornalasýyn eskere otyryp, elimizdiń tranzıttik áleýetin damytý men Ortalyq Azııadaǵy iri logıstıkalyq hab qurý maqsatynda júk aǵymyn tartý boıynsha jumystar atqarylyp jatyr. Búgingi kúni 41 shet memleketpen avtomobıl baılanysyn jandandyrý jónindegi kelisim bekitildi jáne bul jumys odan ary jalǵasýda», - dedi Májilistiń jalpy otyrysynda «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy Halyqaralyq avtomobıl qatynasy týraly kelisimdi ratıfıkatsııalaý týraly» QR Zańynyń jobasyn tanystyrǵan elimizdiń Investıtsııalar jáne damý mınıstri Jeńis Qasymbek.
Onyń aıtýynsha, 2016 jyly avtokólikpen júk tasymaldaý Qazaqstan men Ázerbaıjan arasynda 16 paıyzǵa artyp, 6,2 myń tonnany quraǵan.
«Sizderdiń nazarlaryńyzǵa usynylǵan kelisimde eki el arasynda avtokólik tasymaldaryn júzege asyrýdyń quqyqtyq normalary belgilengen. Avto tasymaldaý túrleri men ruqsat formalaryn almastyrý kvotalaryn belgileý tártibi rettelgen. Bul kelisimniń júzege asyrylýy eki el arasyndaǵy avtokólik tasymalyn odan ári damytýǵa jáne Qazaqstan men Ázerbaıjannyń saýda-ekonomıkalyq yntymaqtastyǵyna yqpal etedi dep senemiz. Kelisimdi ratıfıkatsııalaý bıýdjetten qosymsha qarajat bólýdi talap etpeıdi», - dedi ol.
Májilis depýtattary atalǵan zań jobasyn talqylaǵannan keıin biraýyzdan maquldady.