Qazaqstan 4 «altyn» aldy degende júregim jaryla jazdady - Sanjar Táshkenbaıdyń ákesi

ASTANA. QazAqparat – Birer saǵat buryn elorda áýejaıyna bokstan Álem chempıonaty jeńimpazdarynyń ekinshi legi mingen bort qondy. Jankúıerler altyn medal ıegerleri Sanjar Táshkenbaı men Nurbek Oralbaıdy sán-saltanatymen qarsy aldy, dep habarlaıdy QazAqparat tilshisi.

Qarsy alý saltanatyna boksshylardyń týystary, dostary jáne sport jankúıerleri jınaldy. Sanjar Táshkenbaı osy baıraqty básekede qoldaý kórsetken qazaqstandyqtarǵa alǵys bildirdi.

«Óz nátıjeme kóńilim tolady. Jalpy, jarys qıyn boldy. Bári de Olımpıadaǵa barǵysy keledi. Endi ony ýaqyt kórsetedi, men barymdy salamyn. Barsha jankúıerge alǵys aıtqym keledi», - dedi boksshy BAQ ókilderiniń saýalyna jaýap bere otyryp.

Osy oraıda, Sanjardyń ákesi Táken Shaldybaev ulynyń jeńisine qatysty pikir bildirdi.

«Qazaqstan 4 «altyn» aldy degende júregim jarylyp kete jazdady. 3 qyz, 3 ulym bar. Men óte baqytty adammyn. Mine, bolashaq sport juldyzdary ósip kele jatyr. Sezim erekshe, tolqyp turmyn. Qazir jastarǵa barlyq jaǵdaı jasalǵan. Sonyń arqasynda osyndaı myqty jastar ósip kele jatyr», - dedi chempıonnyń ákesi Táken Shaldybaev.

Al, kelesi chempıon Nurbek Oralbaı keler jyly ótetin Olımpıada oıyndaryna qatysý jáne onda jeńiske jetý úshin bar kúsh-jigerin salatynyn aıtty.

«Alda Olımpıada oıyndary bar. Oǵan bar kúshimizdi salamyz. Men ótken Azııa oıyndarynda ıordanııalyq sportshydan utylyp, 3-oryn alǵan bolatynmyn. Osy joly shırek fınalda sol boksshymen qaıta kezdestim. Bul joly revensh jasap, jeńip aldym», - dep pikir bildirdi Nurbek Oralbaı.

Eske salaıyq, búgin saǵat 13:20-da elorda áýejaıyna Qazaqstan quramasynyń bas bapkeri Myrzaǵalı Aıtjanov pen chempıondardyń alǵashqy legi keldi. Atap aıtqanda, altyn medal ıelengen Mahmud Sabyrhan, Aslanbek Shymbergenov pen kúmis júldeger Dýlat Bekbaýov elge oralǵan bolatyn.