Qazaqstan 36 memleketke balyq ónimderin eksporttaıdy

NUR-SULTAN. QazAqparat – Qazaqstan jyl saıyn 36 elge 30 myń tonna balyq ónimderin eksporttaıdy. Bul týraly búgin ótken Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Bizdiń elimiz óziniń baı ári biregeı tabıǵatynyń arqasynda aıtarlyqtaı qýatty balyq sharýashylyǵy qoryna ıe. Bul baǵytta eksporttyq potentsıal joǵary. Elimizdiń balyq ónimderi naryǵynyń jalpy kólemi 2019 jyly shamamen 66 myń tonnany qurady. Onyń qurylymy kelesideı: balyq aýlaý – 45 myń tonna, balyq ósirý – 7,4 myńǵa jýyq tonna, eksport – 30 myń tonna, ımport – 43,5 myń tonna», - dedi Maǵzum Myrzaǵalıev.

Mınıstr balyq ónimderiniń eksporty týraly aıta kele, Qazaqstan negizinen balyqtyń jon etin, keptirilip-ystalǵan ónimderdi jáne balyqtyń tońazytylǵan etin eksporttaıtynyn málim etti.

«Qazaqstan muhıt balyqtary men teńiz ónimderin ımporttaıdy. Olar – maıshabaq, skýmbrııa, asshaıan, mıdııa jáne taǵy basqalary. Import Norvegııa, Reseı, Islandııa, Qytaı jáne Baltyq jaǵalaýy elderine tıesili.

Óz kezeginde, Qazaqstan jyl saıyn taıaý jáne alys sheteldiń 36 eline shamamen 60 mln AQSh dollary somasyna 30 myń tonna balyq ónimderin eksporttaıdy. Negizinen biz balyqtyń jon etin, keptirilip-ystalǵan ónimderdi jáne balyqtyń tońazytylǵan etin eksporttaımyz. Mysaly, kókserkeniń jon eti Eýropalyq odaq elderinde (Germanııa, Nıderlandy) qazaqstandyq brend bolyp sanalady. Al keptirilip-ystalǵan ónimder Reseı, Ýkraına, Lıtva, Qytaı jáne basqa elderge eksporttalady», - deıdi ol.