Qazaqstan 3 mlrd dollardy syrtqy naryqtan qaryzǵa alady

NUR-SULTAN. QazAqparat – Respýblıkalyq bıýdjet tapshylyǵyn qarjylandyrý úshin syrtqy naryqtan 3 mıllıard AQSh dollary tartylady. Bul týraly ortalyq kommýnıkatsııalar qyzmetiniń alańynda ótken QR Úkimetiniń rezervinen qarajat bólý máselesine arnalǵan baspasóz konferentsııasynda aıtyldy, dep habarlaıdy QazAqparat tilshisi.

«Bıýdjet tapshylyǵyn qarjylandyrý úshin 2,4 trln teńge qaryz alý qajet. Onyń ishinde biz 3 mlrd AQSh dollaryna jýyq kapıtaldy sheteldik naryqtan qaryzǵa alýdy josparlap otyrmyz», - deıdi QR Qarjy mınıstrliginiń birinshi vıtse-mınıstri Berik Sholpanqulov.

Sonymen qatar, ol ishki naryqtan 2,5 trln teńge qaryzǵa alynatynyn aıtty. Onyń ishinde 700 mıllıard teńge «Jumyspen qamtýdyń jol kartasyn» qarjylandyrýǵa jumsalady. Ony «Báıterek» ulttyq basqarýshy holdıngi jergilikti atqarýshy organdardyń qaryzdyq mindettemelerin satyp alý arqyly alady.

Qalǵan qarajatty Ulttyq bank pen ekinshi deńgeıli bankter bir trıllıon teńgege deıin jetkiziletin «Qarapaıym zattar ekonomıkasy» baǵdarlamasyn qarjylandyrýǵa beredi.

Sonymen qatar, ishki kapıtal naryǵynda «Báıterek» holdıngin ornalastyrý arqyly turǵyn úı qurylysyn keńeıtýge 390 mlrd teńge qarastyrylǵan.