Qazaqstan 27 elmen qylmystyq isterge qatysty qujatty bekitti - Senat

NUR-SULTAN. QazAqparat – Parlament Senatynyń jalpy otyrysynda palata depýtattary «Qazaqstan Respýblıkasy men Soltústik Makedonııa Respýblıkasynyń arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» Zańyn qabyldady, dep habarlaıdy QazAqparat tilshisi.

Sharttyń basty maqsaty – kúdikti men aıyptynyń kinásin dáleldeýge arnalǵan protsessýaldyq áreketterdi júzege asyrýdy retteý.

Ol eki eldiń ókiletti organdaryna kelesi tergeý amaldaryn júrgizýge quqyq beredi: qamaýda otyrǵan adamdardy ýaqytsha berý; tintý, zattardy tárkileý, saraptama júrgizý; jaýap alý, aqparat almasý jáne de basqa amaldardy qamtıdy.

«Shartta kózdelgen barlyq tergeý áreketteri bizdiń Qylmystyq-protsestik kodekste bar», - dedi QR Bas prokýrorynyń birinshi orynbasary Berik Asylov.

Shart boıynsha:

- kómek kórsetý el egemendigine, qaýipsizdigine, ózge múddelerine qaýip tóndirse;

- ulttyq zańnamaǵa qaıshy kelse;

- adamdy ulty, násili, dini jáne saıası kózqarasy úshin qýdalaıtyn bolsa, quqyqtyq kómek kórsetilmeıdi.

«Osyndaı sharttar 27 memleketpen (Qytaı, Ulybrıtanııa, Úndistan, AQSh) jasaldy. Qazir Portýgalııa, Kıpr, Domınıkan jáne Argentına elderimen qol qoıý jumystary júrgizilip jatyr. Byltyr basqa memleketterge 163 suratý boıynsha quqyqtyq kómek kórsettik. Bizdiń 185 ótinishimizdi shetel organdary oryndady. Usynyp otyrǵan Shart adam quqyqtary men bostandyqtaryn qozǵaıdy. Sol sebepti, «Halyqaralyq sharttar týraly» Zańǵa sáıkes, Shart ratıfıkatsııalaýǵa jatady. Ony ratıfıkatsııalaý teris ekonomıkalyq, saıası jáne ózge de saldarǵa ákelmeıdi», - dedi B. Asylov.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasy men Soltústik Makedonııa Respýblıkasy arasyndaǵy adamdardy ustap berý týraly shartty ratıfıkatsııalaý týraly» jáne «Qazaqstan Respýblıkasy men Soltústik Makedonııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» zańdary qabyldandy.

2019 jyly Soltústik Makedonııamen sharttardyń tolyq paketine qol qoıyldy.