Qazaqstan 26 elmen vızasyz rejım engizý jóninde kelisip jatyr

ASTANA. QazAqparat – Qazaqstan Avstrııa, Saýd Arabııasy, San-Marıno, Bahreın sııaqty, jalpy 26 elmen ózara vızasyz rejım engizý jóninde kelissózder júrgizip jatyr, dep habarlaıdy QazAqparat.

Mádenıet jáne sport mınıstrliginiń málimetinshe, «Qazaqstanǵa shaqyrý» týraly talaptyń kúshin joıý jáne azamattary elektrondy vıza rásimdeı alatyn elderdiń tizbesin keńeıtý qarastyrylady.

Budan bólek, BAÁ azamattary úshin vızany jeńildetilgen túrde berý máselesi talqylanyp jatyr.

«Sheteldik saıahatshylardyń Qazaqstanǵa qyzyǵýshylyǵy joǵary. Sol sebepti biz elimizdiń týrıstik áleýetin tolyq ashý úshin júıeli túrde jumys istep jatyrmyz. Onyń ishinde kelýshi týrıster aǵynyn ulǵaıtý maqsatyndaǵy is-sharalar bar. Sonymen qatar biz kóshi-qondy baqylaýdy jaqsartýǵa múmkindik beretin tetikterdi iske asyryp otyrmyz. Sonyń biri eQonaq aqparattyq júıesi», - dedi QR Mádenıet jáne sport mınıstrliginiń resmı ókili Móldir Ábdýalıeva.