Qazaqstan 2050 jylǵa qaraı jasyl jańǵyrtý esebinen JІÓ-ge qosymsha 3 paıyzdyq ósim alady - N.Qapparov
Bul týraly búgin elordada ótip jatqan VI Astana ekonomıkalyq forýmy aıasyndaǵy «Indýstrııaldy revolıýtsııa - «jasyl ekonomıkaǵa» kóshý» atty sessııada QR Qorshaǵan ortany qorǵaý mınıstri Nurlan Qapparov málim etti.
«Qazaqstan Úkimetiniń esebi boıynsha jasyl jańǵyrtýdan ekonomıkalyq qaıtarym oń bolady. 2030 jylǵa qaraı biz 400-600 myń jańa jumys ornyn quramyz. Al 2050 jylǵa qaraı «jasyl» damý jańa modeline kóshpeı-aq boljanatyn jalpy ishki ónimge qosymsha 3 paıyzdyq ósim alamyz», - dedi N.Qapparov.
Onyń atap ótýinshe, «jasyl» ekonomıka barynsha ártaraptandyrylǵan bolady jáne de óńirlik damýdyń teńgerimdiligin qamtamasyz etedi.
Jalpy, mınıstrdiń sózine qaraǵanda, ekonomıkalyq jańǵyrtýdyń jasyl baǵdary 5 qaǵıdatqa negizdeletin bolady. Olar mynalar: resýrstardy paıdalaný tıimdiligi, jańa býyn tehnologııasy, áleýmettik dıvıdendter, resýrstardyń naryqtyq baǵasy jáne oılaý men aǵartýdyń jańa úlgisi.