Qazaqstan 2030 jyly aýany lastaıtyn gazdardyń taralýyn 25%-ǵa azaıtýdy josparlap otyr - V. Shkolnık

ASTANA. QazAqparat - Qazaqstan 2030 jyly aýany lastaıtyn gazdardyń taralýyn 1990 jylmen salystyrǵanda shartsyz maqsaty retinde 15%-ǵa, shartty maqsaty retinde 25%-ǵa azaıtýdy josparlaýda. Bul týraly búgin Astanada "Qazaqstannyń ýly parnıktik gazdardyń taralýyn azaıtý boıynsha 2021-2030 jyldarǵa arnalǵan ulttyq mindettemeleri" atty semınarda QR Energetıka mınıstri Vladımır Shkolnık málim etti.

"Biz xalyqaralyq úderisterdiń tolyqqandy múshesi retinde jahandyq maqsattardyń oryndalýyna jáne turaqty sheshimderge óz úlesimizdi qosyp kelemiz, onyń shinide klımat máseleleri de kiredi. Memleket Basshysy Nursultan Nazarbaevtyń jahandyq ekonomıkanyń turaqtylyǵyna qol jetkizý boıynsha, sonyń ishinde EQYU aıasynda "jasyl" texnologııalardy damytý jáne ınvestıtsııalyq jobalardy qoldaý boıynsha xalyqaralyq ortalyqty Astanada qurý jónindegi usynysy álemdik qaýymdastyqtyń joǵary baǵasyna ıe boldy. Ózderińiz bilesizder, "jasyl" texnologııalardy damytý álemniń turaqty damýynyń 13 maqsatynyń biri bolyp tabylady. Ol klımattyń ózgerýine qarsy kúres jáne onyń saldarlaryn aldyn alýǵa septigin tıgizetin joldardyń biri. Osyǵan oraı Energetıka mınıstrligi QR Prezıdenti janyndaǵy "jasyl" ekonomıka keńesinde Lıma qalasynda ótken 20-shy konferentsııada qabyldanǵan sheshimdi, parnıktik gazdardy azaıtý boıynsha ulttyq maqsattardy taǵy bir talqylaýdan ótkizgen bolatyn", - dedi mınıstr.

Onyń atap kórsetkenindeı, Qazaqstan 2030 jyly aýany lastaıtyn gazdardyń taralýyn 1990 jylmen salystyrǵanda shartsyz maqsaty retinde 15%-ǵa, shartty maqsaty retinde 25%-ǵa azaıtýdy josparlaýda.

"Bul - óz kezeginde ulttyq ekonomıkany kómirqyshqyldan azaıtý boıynsha keshendi sharalardy jasaýdy talap etetin óte úlken maqsat", dep túıdi oıyn V. Shkolnık.