Qazaqstan 2030 jylǵa deıin parnıktik gaz qaldyqtaryn 15%-ǵa tómendetpek

ASTANA. QazAqparat – El Úkimeti «QR 2060 jylǵa deıin kómirtegi beıtaraptyǵyna qol jetkizý strategııasyn bekitý týraly» Prezıdent Jarlyǵynyń jobasyn ázirledi. Qujat «Ashyq» NQA portalynda jarııalandy, dep habarlaıdy QazAqparat tilshisi.

«Qazaqstan 2016 jyly Parıj kelisimine qol qoıar aldynda BUU-nyń Klımattyń ózgerýi týraly negizdemelik konventsııasy sheńberinde óziniń ulttyq deńgeıde aıqyndalatyn úlesin anyqtady. Sonyń negizinde mynadaı maqsattarǵa qol jetkizý kózdeledi:

- Parnıktik gaz shyǵaryndylaryn 1990 jylmen salystyrǵanda 2030 jyly jeltoqsanǵa qaraı 15%-ǵa mindetti tómendetý;

- qosymsha halyqaralyq ınvestıtsııalar, tómen kómirtekti tehnologııalar, Jasyl klımattyq qor qarajatyn berý tetigine qoljetimdilik jáne ótpeli ekonomıkasy bar elder úshin ıkemdi tetik bolǵan jaǵdaıda parnıktik gaz shyǵaryndylaryn 1990 jylmen salystyrǵanda 2030 jylǵy jeltoqsanǵa qaraı shartty túrde 25%-ǵa qysqartý.

Qazaqstan Respýblıkasynyń 2060 jylǵa deıin kómirtegi beıtaraptyǵyna qol jetkizý strategııasy jahandyq klımattyq úrdisterdi eskere otyryp ázirlendi», - delingen ashyq talqyǵa shyǵarylǵan qujatta.

Usynylyp otyrǵan strategııa aıasynda elimizde jasyl ınvestıtsııalardy ilgeriletý, olardy tartý, tıimdi energııa óndirisi jáne basqa da jahandyq klımattyq úrdisterge beıimdeý jumystary qolǵa alynady.