Qazaqstan 2025 jylǵa qaraı 100 myń IT-maman daıarlaıtyn bolady

ASTANA. QazAqparat –Qazaqstanda IT-bilim berýdi qoldaýǵa erekshe nazar aýdarylǵan. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jelide jazdy, dep habarlaıdy QazAqparat.

«Tech Orda baǵdarlamasy aıasynda 3 myńnan astam qazaqstandyq stýdent IT-mamandyqtar boıynsha bilim alyp jatyr. Olar qazirgi ýaqytta 49 jekemenshik IT-mektepterde oqýda. Oqytý uzaqtyǵy 6 aıdan 2 jylǵa deıin sozylady. Bul baǵdarlama boıynsha ІT-mamandardyń birinshi legi 2023 jyldyń ortasyna qaraı daıyn bolady. Osylaısha, biz 2025 jylǵa qaraı 100 myń IT-maman daıarlaıtyn bolamyz. Onyń 20 myńy - Tech Orda baǵdarlamasy boıynsha júzege asady.Tech Orda baǵdarlamasy Astana Hub aınalysatyn barlyq basym sektorlardy qamtıdy - veb-ázirleý, 3D-dızaın, baǵdarlamalyq jáne apparattyq quraldar jasaý, mobıldi qosymshalar ázirleý, Big Data, Blockchain jáne t.b. Oqytý qazaq, orys jáne aǵylshyn tilderinde júrgiziledi», - dep jazdy mınıstr.

Onyń aıtýynsha el aımaqtarynda IT-bilim berýdi qoldaýǵa erekshe nazar aýdarylǵan.

«Óńirlerde 17 IT-mektep (bul IT mektepterdiń 35%-yn quraıdy) ashyldy. Mektepter Aqtaý, Aqtóbe, Atyraý, Qaraǵandy, Qyzylorda, Pavlodar, Semeı, Oral, Shymkent qalalarynda ornalasqan. Bıylǵy jyly IT mektepterge oqýǵa nıet bildirgen stýdentterden 16 myńǵa jýyq ótinish kelip tústi. Nátıjesinde 3 068 stýdent IT salasynda kásibı damýy úshin bilim alýdy bastady», - dep tolyqtyrdy B.Mýsın.