Qazaqstan 2017 jyly Baıqońyr aılaǵynyń ushyrylym josparyn bekitti

ASTANA. QazAqparat - QR Úkimeti 2017 jyly Baıqońyr aılaǵynan ǵarysh apparattary men synaq zymyrandaryn ushyrý josparyn bekitti, dep habarlaıdy QazAqparat tilshisi Qorǵanys jáne aeroǵarysh ónerkásibi mınıstrliginiń baspasóz qyzmetine silteme jasap.

Josparǵa sáıkes, Reseı federaldy ǵarysh baǵdarlamasy aıasynda 2017 jyly Baıqońyr aılaǵynan 17 tasymaldaýshy-zymyran ushyrylady. Keler jyly 8 «Soıýz» tasymaldaýshy-zymyrany ǵaryshqa ushyrylady, olar 4 «Soıýz MS» kóliktik basqarylatyn kemelerin, 3 «Progress MS» kóliktik júk kemelerin jáne bir «Kanopýs V- IK» JQZ spýtnıgin orbıtaǵa shyǵarady.

Ushyrý sany jaǵynan ekinshi orynda - «Proton-M» tasymaldaýshy-zymyrany tur. 2017 jyly 7 «Proton-M» tasymaldaýshy-zymyrany ushyrylady, onyń ekeýi áskerı ushyrylym. Josparlanǵan orbıtalarǵa jetkiziletin ǵarysh apparattarynyń arasynda «Glonass» reseılik tobynyń navıgatsııalyq qamtamasyz etý, kópmaqsatty zerthanalyq modýl, álemniń túrli elderiniń telekommýnıkatsııalyq ǵarysh apparattaryn kommertsııalyq ushyrýlar bar.

2017 jyly Baıqońyr aılaǵynyń ushyrylym josparynda «Angosat» telekommýnıkatsııalyq spýtnıgi men ýkraınalyq «Lybıd» ǵarysh apparatyn jiberýge arnalǵan eki «Zenıt» tasyǵysh-zymyranyn ushyrý bar.

Baıqońyrdyń bıylǵy ushyrylym jospary merziminen buryn aıaqtaldy. Keltirilgen statıstıkaǵa súıensek, 2016 jyly Baıqońyr aılaǵynan 11 tasyǵysh-zymyran ushqan.