Qazaqstan 2016 jyly 6,27 mlrd teńgege ǵarysh sýretterin túsirgen
Bul týraly búgin Ortalyq kommýnıkatsııalar qyzmetinde ótken brıfıngte QR Investıtsııalar jáne damý mınıstrligi Áýeǵarysh komıtetiniń tóraǵasy Erkin Shaımaǵambetov málim etti.
«2016 jyldan bastap, respýblıkalyq bıýdjet aıasynda memlekettik organdarmen jáne uıymdarmen jerdi qashyqtyqtan zondtaý júıesi arqyly ǵaryshtan túsirilgen sýretter tegin berilýde. 1 qyrkúıektegi jaǵdaı boıynsha, aǵymdaǵy jyly ǵaryshtan 10 mln. sharshy shaqyrym jer túsirilgen. Olardyń kommertsııalyq quny 6,27 mlrd teńge», - dedi Shaımaǵambetov.
Onyń sózi boıynsha, 2015 jyly qurylǵan QR Jerdi qashyqtyqtan zondtaý ǵarysh júıesi aýyl sharýashylyǵy, geodezııa, ekologııalyq zertteýler maqsattaryna jáne tótenshe jaǵdaılar kezinde jedel ári sapaly sýretterdi alýǵa múmkindik berdi.
«Jalpy júıe iske qosylǵaly beri 280 mln. sharshy shaqyrym jer sýretke túsirildi. Sonymen qatar memlekettik organdarǵa 7,4 mln. sharshy shaqyrym jerdiń sýretteri tegin tapsyryldy. Olardyń naryqtyq quny shamamen 5,4 mlrd. teńgeni quraıdy», - dep atap ótti komıtet basshysy.
Sonymen qatar E. Shaımaǵambetovtyń aqparaty boıynsha, Kazsat ǵaryshtyq baılanys júıesi 2011 jáne 2016 jyldary aralyǵynda 15 baılanys operatory men Qazaqstan uıymyna qyzmet kórsetken.
«5 jyl ishinde Kazsat júıesi shetel operatorlarynyń qyzmetin almastyra aldy, onyń ımport almastyrý kólemi shamamen 18 mlrd. teńgeni quraıdy», - dep túıdi sózin komıtet basshysy.