Qazaqstan 1 500-den astam sheteldik jumys kúshine ruqsat berýden bas tartty

NUR-SULTAN. QazAqparat – Qazaqstan 1 500-den astam sheteldik jumys kúshine elimizde jumys isteýge ruqsat berýden bas tartty. Bul týraly QR Eńbek jáne halyqty áleýmettik qorǵaý mınıstri Birjan Nurymbetov Úkimet úıindegi baspasóz máslıhatynda aıtty, dep habarlaıdy QazAqparat tilshisi.

Mınıstrdiń aıtýynsha, álemdi sharpyǵan koronavırýsqa baılanysty elimizde jumys istep júrgen sheteldik jumys kúshteri kúndelikti baqylaýǵa alynǵan.

«Búginde elimizde byltyr kelgen 19 myńnan astam sheteldik azamat ruqsaty boıynsha jumys istep jatyr. Sonyń ishinde 1, 2, 3 sanatqa kiretin memleketterdiń burynnan jumys istep kele jatqan 7 260 ókili bar. Al aqpan aıynda elimizden jumys kúshi retinde ruqsat almaq bolyp otyrǵan 1 543 sheteldik bolǵan edi. Olarǵa ruqsat endi berilmeıdi. Atalǵan úsh sanatqa kiretin elderdiń azamattaryna ruqsat berý toqtatyldy. Elimizde jumys istep júrgen atalǵan úsh sanatqa kiretin memlekettiń 7 myńnan astam azamaty úılerine baryp kelemin dese, onda qaıtadan Qazaqstanǵa kire almaıdy. Sondaı talap qoıylyp otyr», - dedi Birjan Nurymbetov.

Aıta keteıik, taıaýda Qazaqstan bas sanıtarlyq dárigeriniń elde koronavırýs ınfektsııasynyń aldyn alý sharalaryn kúsheıtý boıynsha qaýlysy jarııalanǵan bolatyn. Onda koronavırýs kelýi múmkin qaýipti elder 3 sanatqa bólingen.