«Qazaqsha Vıkıpedııaǵa» 136 myńnan astam maqala ornalastyryldy

ASTANA. 18 shilde. QazAqparat - QR Premer-Mınıstriniń uıytqy bolýymen iske asyrylyp otyrǵan "Qazaqsha Vıkıpedııa" jobasyna 136 myńnan astam maqala ornalastyrylyp, barlyq qaralǵan betterdiń sany 5 mıllıonǵa jetti, dep habarlady «Wikibilim» qoǵamdyq qorynan pm.kz saıtyna.

Qordyń aqparaty boıynsha, búgingi tańda qazaqsha Vıkıpedıadaǵy maqalalardyń sany 136 myńǵa jetip, qaralǵan betterdiń sany 5 mıllıonnan asty. Erikti negizde maqala jazýshy belsendi redaktorlardyń sany 250 adamdy qurap otyr, joba jańadan qolǵa alynǵan kezde nebári 4 redaktor bolatyn.

Álemniń 80-nan astam elindegi vıkı-qoǵamdastyqtardyń ókilderi qatysqan «Vıkımanııa-2012» halyqaralyq konferentsııasynda «WikiBilim» jobasy erekshe atalyp ótti.

«Konferentsııaǵa qatysýshylar bizdiń jobanyń damýyna qyzyǵýshylyq bildirdi. Kóptegen tildik bólimder úshin bul asa ózekti másele, sebebi olarda sońǵy jyldary belsendi redaktorlardyń sany birtindep azaıyp keledi. Sondyqtan da, kópshiliktiń moıyndaýynsha, Vıkıpedııalardyń jáne basqa da vıkı-jobalardyń ári qaraı ósýi men damýy kóbine qazaq tilindegi sııaqty tildik bólimderdiń ósýimen baılanysty»,- deıdi «WikiBilim» qorynyń jetekshisi Raýan Kenjehanuly pm.kz saıtyna bergen suhbatynda.

Qor jetekshisiniń aıtýynsha, «adamzattyń bilim qoryna erkin qol jetkizý» degen Vıkıpedııanyń  jalpy urany «ana tilindegi adamzattyń bilim qoryna erkin qol jetkizý» dep ózgerip keledi.

Konferentsııada sondaı-aq vıkı-tuǵyrnamalardy entsıklopedııalyq emes maqsattarda qoldanýdyń múmkindikteri talqylandy. Atap aıtqanda, amerıkandyq bilim berý júıesinde osyndaı tuǵyrnamalardyń belsendi qoldanyla bastaǵany mysalǵa keltirildi.

 «WikiBilim» basshysy sondaı-aq, maqalalar  sanynyń ósýi emes, oqyrmandardyń jáne maqalalar jazyp, olardy redaktsııalaıtyn belsendi redaktorlardyń kóbeıýi  mańyzdy másele ekenin atap kórsetti. Stýdentter men ýnıversıtet qoǵamdastyqtaryn entsıklopedııanyń áleýetti avtorlaryna  qataryna jatqyzǵan R.Kenjehanuly: «Stýdentterdiń referattary, kýrstyq jáne dımlomdyq jumystary tek stýdent pen oqytýshynyń arasynda ǵana qalyp qoıyp jatady, al olardy buqaralyq deńgeıge shyǵarýǵa ábden bolady. Bul bastama  stýdenttiń de, oqytýshynyń da jaýapkershiligin arttyrady. Al entsıklopedııa damýdyń mol múmkindigine ıe bolady», - dedi.

Esterińizge sala keteıik, «Qazaqsha Vıkıpedııa» Qazaqstan Respýblıkasynyń Premer-Mınıstri Kárim Másimovtiń uıytqy bolýymen 2011 jyldyń maýsym aıynda  júzege asyryla  bastady. «Vıkımanııa» (Wikimania-2011) halyqaralyq konferentsııasynyń qorytyndysy boıynsha «Qazaqsha Vıkıpedııa» Jyl Vıkıpedııasy (Global Wikipedian - 2011) atandy.