QazAqparattyń shyǵarýshy redaktory halyqaralyq músháırada júldeger atandy

NUR-SULTAN. QazAqparat - Táýelsizdik merekesine oraı uıymdastyrylǵan aqyn, saǵynyshtyń sımvolyna aınalǵan shaıyr-jyraý, «Alash» ádebı syılyǵynyń ıegeri Járken Bódeshulynyń shyǵarmashylyǵyna arnalǵan «Sarykóbelek saǵynysh» atty halyqaralyq jazba aqyndar músháırasy máresine jetti, dep habarlaıdy QazAqparat tilshisi.

Atalǵan sharany Aqıyq aqyn Járken Bódeshulynyń shynaıy shyǵarmashylyǵyn nasıhattaý jáne ónerge qushtar óresi bıik jastarǵa qoldaý kórsetý maqsatynda ult rýhanııatyna janashyr kásipkerlerdiń qoldaýymen, Dúnıejúzi qazaqtarynyń qaýymdastyǵy jáne «Otandastar qory» KeAQ, «Alash-CUP» qaıyrymdylyq qory birlese uıymdastyrdy.

Atalǵan jyr dodasyna Nur-Sultan, Almaty, Shymkent qalalarymen qatar elimizdiń barlyq oblystarynan jáne alys-jaqyn shet elderdegi qandastarymyzdyń arasynan «óleńge talasy bar» 40 jasqa deıingi qyryqqa jýyq jas aqyn qatysty.

Óleń ólkesine ózindik órnegimen kelgen ónerli jastardyń tól týyndylaryn saraptap-saralaýǵa, ádiletti baǵalaýǵa elimizdiń kórnekti aqyndary, respýblıkalyq «Tórtinshi bılik» basylymynyń bas redaktory Tólemyrza Baltabaev, ál-Farabı atyndaǵy Qazaq ultyq ýnıversıtetiniń oqytýshysy Murat Shaımaranuly, Qazaqstan Jazýshylar odaǵy tóraǵasynyń birinshi orynbasary Aqberen Elgezek, Qazaqstan Jazýshylar odaǵy Nur-Sultan qalalyq fılıalynyń tóraǵasy Dáýletkereı Kápuly, respýblıkalyq «Ana tili» gazetiniń bas redaktory Janarbek Áshimjan jáne Dúnıejúzi qazaqtary qaýymdastyǵy men «Otandastar Qorynyń» ókili Serik Ábdýáli syndy tanymal tulǵalar qatysyp, qazylyq jasady.

Qazylar alqasynyń sheshimimen Bas júlde Qytaıdaǵy qandastar arasynan jasyndaı jarqyrap shyqqan belgili aıtysker aqyn Erjanat Baıqabaıulyna berildi.

Birinshi oryn talantty jas aqyn Ádilet Ahmetulyna (Almaty), ekinshi oryndy Tólegen Mellatuly (Almaty) men «QazAqparat» halyqaralyq aqparat agentiginiń shyǵarýshy redaktory Rızabek Núsipbekuly (Nur-Sultan) enshiledi.

Al, úshinshi oryndy Orazaı Jeńisuly (Mońǵolııa), Naýryzbaı Jarbosynuly (Ózbekstan), Kókbóri Múbarak (QHR) esimdi aqyndar qanjyǵasyna baılady.

Sondaı-aq, jyr dodasynda alamanǵa atoılap at qosqan Marlen Ǵılymhan (BQO, Oral qalasy), Muqaǵalı Muhanbetqalıuly Seıitqazy (Qaraǵandy), Dilda Ýálıbekova (Nur-Sultan), Dúısenáli Álimaqyn (Almaty), Úmitbek Baǵdatuly (Túrkistan), Qundyz Tasqynbek (ShQO) qatarly talaby taýdaı aqyndarǵa arnaıy júlde taǵaıyndaldy.

Jeńimpazdardyń barlyǵyna uıymdastyrýshylar tarapynan Qurmet gromatasymen qosa aqshalaı júlde tabystalady.

Músháırada oza shaýyp, olja salǵan jeńimpazdardy aldaǵy ýaqytta aqyn Járken Bódeshulynyń qatysýymen ótetin «Sarkóbelek saǵynysh» atty qorytyndy shyǵarmashylyq keshte saltanatty túrde arnaıy marapattaý josparlanyp otyr.