«QazAqparattyń» 100 jyldyǵy syılyǵyn Mońǵolııadaǵy qazaqtildi portal men TASS agenttigi jeńip aldy
Marapat reseılik «TASS» agenttigi men Mońǵolııadaǵy qazaqtildi «Kaznews.mn» portalyna berildi.
«Bir ǵasyrlyq tarıhy bar «QazAqparat» halyqaralyq aqparat agenttiginiń negizgi damýy bizdiń elimizdiń táýelsizdik alǵan kezinen bastaldy. Sol kezde biz halyqaralyq aqparat agenttigi atandyq. Sonymen, osy arnaıy júldeni biz ózimizdiń sheteldik áriptesterge beretin boldyq. Ekige bóletin boldyq. Sondyqtan, Úrker músinshesi men sertıfıkatty 100 jyl boıy áriptes bolǵan reseılik TASS aqparat agenttigine berýdi uıǵardyq», - dedi «QazAqparat» AQ Basqarma tóraǵasy Asqar Ýmarov «Úrker-2020» ulttyq syılyǵynyń marapattaý keshinde.
Syılyqty TASS agenttiginiń Qazaqstandaǵy ókili Dmıtrıı Karaman aldy.
«Kútpegen jerden mundaı syılyq alǵanymyzǵa qýanyshtymyz. Jeke ózim Qazaqstanda bir jyldan beri jumys istep kelemin. Osyndaı az ýaqytta Qazaqstan men úshin jaqyn ári ystyq elge aınaldy. Bizdiń agenttiktiń Qazaqstanmen jáne QazAqparat agenttigimen jyldar boıǵy tabysty qarym-qatynasy áli de jalǵasyn tabady dep úmittenemin. Rahmet», - dedi Dmıtrıı Karaman.
Tıisinshe, 1 mıllıon teńge aqshalaı júlde Mońǵolııadaǵy qazaqtildi «Kaznews» portalyna berildi.
«Bizdiń agenttikte 46 halyqaralyq seriktesimiz bar. Odan bólek, byltyr Otandastar qorymen birigip, Aqparat jáne qoǵamdyq damý mınıstrliginiń qoldaýymen alǵash ret «Sheteldegi qazaqtildi BAQ» jıynyn ótkizdik. Jaqynda qaýymdastyq qurylady. Sonymen osy mıllıon teńgeni sheteldegi qandastarǵa, Mońǵolııadaǵy jalǵyz qazaqtildi «Kaznews» portalyna tapsyratyn boldyq», - dedi A. Ýmarov.
Saıttyń quryltaıshysy jáne redaktory Ómirbek Qabaıuly Mońǵolııadan kele almaǵandyqtan, syıaqy onyń Qazaqstandaǵy inisine tapsyryldy.
2011 jyly Mońǵolııada alǵash ret qazaq tilindegi www.kaznews.mn vebsaıtynyń irgetasy qalanyp, 9 jyl boıy ǵalamtorda Mońǵolııa men osy eldegi qazaqtar týraly qazaq tilinde aqparat taratyp keledi. Saıttyń quryltaıshysy da, shyǵarýshysy da – Ómirbek Qabaıuly. Saıtqa esh uıymnan qarjy bólinbeıdi, Ómirbek Qabaıuly óz qarajatyna shyǵaryp keledi jáne bul Mońǵolııadaǵy jalǵyz qazaq saıty.
KAZNEWS.MN – Mońǵolııanyń, mońǵolııa qazaqtarynyń, Baıan-Ólgeı aımaǵynyń ǵalamtordaǵy tynysy bola aldy. Búginge deıin 3000-ǵa jýyq maqala saıtqa jarııalanyp, ǵalamtorda sheteldik qazaq tilindegi kontentti damytýǵa úles qosty. Internette Baıan-Ólgeı, mońǵolııa qazaqtary týraly ilmekter izdeý júıesinde joǵary oryn aldy. Shetelde qazaq tiliniń damýyna úles qosý, qazaq tilinde jańalyqtar taratyp, maqalalar jarııalaý basty maqsaty boldy.