QazAqparat tilshisi kıeli jerler týraly derekti fılm túsirýge uıytqy boldy
Derekti fılmdi túsirý ıdeıasynyń avtory – «QazAqparat» Halyqaralyq aqparat agenttiginiń tilshisi Vıktor Sýtıagın.
«Jyl saıyn eńbek demalysymdy, sondaı-aq birneshe kúnge sozylatyn merekege baılanysty demalys kúnderin tekke ótkizbeı, ózge elderge saıahattaǵandy janym qalaıdy. Al byltyr pandemııaǵa baılanysty shekteýler engizilip, saıahatqa shyǵa almadym. Biraq, demalysymdy bosqa ótkizgim kelmedi. Burynnan áriptestik baılanys ornatqan operatorlar Temirlan Sultanǵazıev pen Ázilhan Ýahıtovqa Atyraý oblysyndaǵy tarıhı, mádenı oryndardy aralap, rolık túsirý jóninde usynys aıttym», - deıdi Vıktor Sýtıagın.
Onyń aıtýynsha, alǵashqy rolık túsirýdi Inder aýdanyndaǵy Tuzdy kólden bastaǵan. Munda jaz aılarynda elimizdiń ár óńirinen, tipti ózge de memleketterden kelýshiler kóp. Tuzdy kólden, Jylyoı aýdanyndaǵy Aqtolaǵaı atalatyn borly taý shatqalynan túsirilgen rolıkter áleýmettik jelide jarııalanǵan.
«Jylyoı aýdanynda Aqtolaǵaı dep atalatyn borly taý shatqaly bar. Sol jerden alǵan áserdi sózben aıtyp jetkizý qıyn. Aqtolaǵaıdy kózben kórý kerek. Isataı aýdanyndaǵy qumdy tóbe de – tabıǵat syıy. Osynyń bárin rolıkke túsirip, áleýmettik jelige jarııaladyq. Rolıktiń ózin ǵana usynbaı, ár tarıhı, mádenı oryndarǵa qatysty derekterdi de qosa jarııaladyq. Óıtkeni, buryn mundaı tarıhı oryndar týraly derekterdi tek tarıhshylar men arheologtar ǵana biletin. Endi osyndaı derekter stýdentter men oqýshylar, barsha turǵyndar úshin qoljetimdi bolǵanyn qaladym. Bizdiń bul ıdeıamyzdyń durystyǵyn rolıkterimizge pikir bildirýshilerdiń kóbeıýinen ańǵardyq. Óńirdegi sheteldik kompanııa ókilderi osyndaı rolıkterdi jınaqtap, derekti fılm túsirýdi jalǵastyrýǵa qoldaý bildirdi», - deıdi Vıktor Sýtıagın.
«QazAqparat» HAA tilshisi uıytqy bolǵan derekti fılmde 4 serııa bar. Derekti fılm qazaqsha, oryssha jáne aǵylshyn tilinde daıyndalǵan. Endi ony jergilikti telearnalar men aqparattyq resýrstardan kórsetý josparlanyp otyr.
«Bizdiń maqsatymyz – Atyraý oblysyndaǵy ishki týrızmdi damytýǵa yqpal etetin tarıhı, mádenı oryndardy jurtshylyq nazaryna usyný. Osy maqsatpen Inder, Mahambet, Maqat, Jylyoı aýdandaryndaǵy kıeli jerler geografııasyna engen tarıhı, mádenı oryndar týraly rolıkter túsirdik. Derekti fılmdi odan ári jalǵastyrý úshin Qyzylqoǵa men Qurmanǵazy aýdandaryna baryp, osyndaı rolıkter túsirýdi kózdep otyrmyz», - dep aldaǵy josparymen bólisti agenttik tilshisi.