«QazAqparat» qyzmetkerleri kóshet otyrǵyzdy: Ár portaldyń óz aǵashy bar

NUR-SULTAN. QazAqparat – Búgin «QazAqparat» HAA» AQ qyzmetkerleri Nur-Sultan qalasy Esil aýdany ákimdigimen birlesip, astanadaǵy Jelilik parkte (Ábý Dabı plaza kesheni men Botanıka baǵy arasynda) aǵash otyrǵyzdy.

«Qalamyzdyń árbir turǵyny elordany kórkeıtýge at salyssa deımiz! Sonyń ishinde Sizdermen osy aǵash otyrǵyzý aktsııasyna qatysqanyma rızamyn. Kóterip otyrǵan bastamalaryńyz qutty bolsyn! Bul jelilik park aldaǵy aıda Ábý Dabı kesheni men Botanıka baǵyn jalǵaıtyn bolady. Turǵyndar men qala qonaqtarynyń demalysyna jaıly bolýy úshin kóp úles qosa bereıik», - deıdi Esil aýdanynyń ákimi Berik Jákenov.

Aıta keterligi, «QazAqparat» HAA» AQ qyzmetkerleri otyrǵyzǵan bul aǵashtar kompanııanyń keńsesine jaqyn mańdaǵy saıabaqta. Sondyqtan da «QazAqparat» HAA» AQ Basqarma Tóraǵasy Asqar Ýmarov qyzmetkerlerimiz bos ýaqytta demalǵanda, osy parkten ary-beri ótkende, ózderi otyrǵyzǵan aǵashqa qaraılap júrsin degen tilek bildirdi. «Bul aǵashtarǵa ǵana emes, osy parktiń tazalyǵyna, ádemiligine barshamyz jaýapty bolaıyq. Osyndaı múmkindik bergeni úshin ákimdikke alǵys aıtamyz. Elordamyz, elimiz de kórkeıe bersin», - dedi Basqarma Tóraǵasy.

Aıta keteıik, aktsıonerlik qoǵamda 9 portal bar. Endigi kúni «QazAqparat» HAA» AQ quramyndaǵy árbir portaldyń atap aıtqanda, inform.kz, baigenews.kz, baq.kz, strategy2050.kz, adebiportal.kz, e-history.kz, primeminister.kz, el.kz, kaztube.kz vıdeo portaldarynyń astanada óz ataýly aǵashy bar degen sóz.

Ákimdik málimetine sáıkes, Ábý Dabı plaza kesheninen bastalatyn Jelilik park bıyl Botanıkalyq baqpen qosylady. Sondyqtan da «QazAqparat» HAA qyzmetkerleri otyrǵyzǵan aǵash kóshetteri aldaǵy ýaqytta azamattar jıi keletin, demalysqa yńǵaıly orynǵa
aınalatyny sózsiz.