«QazAqparat» qysqy Olımpıada oıyndarynan tikeleı aqparat alatyn júıege qosyldy

ASTANA. QazAqparat - «QazAqparat» HAA Koreıa Respýblıkasynyń «Yonhap» iri aqparat agenttigimen kelisim jasady. Kelisimge sáıkes, «QazAqparat» Yonhap agenttiginiń PyeongChang News Service Network (PNN - «Phenchhan aqparattar jelisi») júıesine qosylatyn bolady.

Toqtala ketetin jaıt, 2018 jyldyń aqpan-naýryz aılarynda Koreıanyń Phenchhan qalasynda qysqy Olımpıada jáne Paralımpıada oıyndary ótedi. Al Yonhap agenttigi PNN júıesi arqyly álemniń aqparat agenttikterine qysqy Olımpıada oıyndarynan jańalyqtar, fotografııalar, beıne-rolıkter men aqparattar taratatyn bolady. Osyǵan baılanysty «QazAqparat» HAA kelisim aıasynda Olımpıada oıyndary barysynan qajetti aqparat ónimderin der kezinde alý múmkindigine ıe bolyp otyr.

«QazAqparat» pen Yonhap agenttkteri kelisim jasaı otyryp, PNN jelisiniń qysqy Olımpıada oıyndarynan habar taratýǵa ǵana emes, memleketterdiń ekijaqty qarym-qatynastaryn nyǵaıtýǵa da septigin tıgizetinin atap ótti. Bul rette PNN jelisi Olımpıada men Paralımpıada oıyndary aıaqtalǵannan keıin de aqparat almasýdyń platformasy retinde paıdalanylmaq.

Aıta keteıik, Koreıanyń jetekshi aqparat agenttigi Yonhap-tyń negizi 1980 jyly 19 jeltoqsanda «Hapton» jáne «Tonıan» agenttikterin biriktirý nátıjesinde qalanǵan bolatyn.