«QazAqparat» Qazaqstandaǵy TOP-5 aqparattyq resýrstyń qataryna kiredi – Kemelbek Oıshybaev

NUR-SULTAN. QazAqparat – Osy jyldyń basynan beri QazAqparat portalyna 25 mln-nan astam paıdalanýshy kirdi. Bul týraly QR Aqparat jáne qoǵamdyq damý vıtse-mınıstri Kemelbek Oıshybaev aıtty, dep habarlaıdy QazAqparat tilshisi.

«QazAqparat jetekshi memlekettik portaly búginde Qazaqstandaǵy úzdik 5 aqparattyq resýrstyń qataryna kiredi. Tek osy jyldyń basynan beri oǵan 25 mln-nan astam paıdalanýshy kirdi. QazAqparatqa memlekettik BAQ retinde birden haıpqa aınalmaıtyn áleýmettik jobalardy damytýǵa týra keledi. Biraq, olardyń tárbıelik jáne aǵartýshylyq qyzmeti bar. Olar - ádebıet pen tarıh salasyndaǵy áleýmettik jobalar», - dedi vıtse-mınıstr «Astana Media Week – 2021» medıa aptalyǵy aıasyndaǵy «Medıany damytý strategııasy» atty dóńgelek ústel barysynda.

Sonymen qatar ol Qazaqstan teleradıokorporatsııasynyń saıtyna da kún saıyn 400 myń paıdalanýshy kiretindigin aıtty.

«Qazirdiń ózinde memlekettik buqaralyq aqparat quraldary dál osy ınternet-aýdıtorııamen belsendi jumys isteýi úshin qarqyndy áreket etýdemiz», - dedi Kemelbek Oıshybaev.