«QazAqparat» HAA ujymy Arys turǵyndaryna eki kúndik jalaqysyn aýdarady

NUR-SULTAN. QazAqparat - «QazAqparat» halyqaralyq aqparat agenttiginiń qyzmetkerleri eki kúndik jalaqysyn Arysta bolǵan jarylystan zardap shekkenderge aýdarady.

Aıta keteıik, «QazAqparat» osyǵan deıin Túrkistan oblysynyń Arys qalasyndaǵy áskerı bólimniń qoımasynda jarylys bolǵandyǵyn habarlady.

Oqıǵa ornyna shuǵyl túrde Memleket basshysy Qasym-Jomart Toqaev jetip, jarylys aýmaǵynan evakýatsııalanǵan turǵyndarmen kezdesti.

QR Prezıdenti «Qala qalpyna keltiriledi, bári durys bolady. Bul tótenshe jaǵdaı, apat. Qaıtemiz, keıbir ýaqytta solaı bolady. Úkimet aqsha, qarajat beredi, kómektesedi, alańdamańyzdar!. Bári jaqsy bolady. Jóndeý jumystaryn jasap beremiz. Úkimet qansha qarajat kerek ekenin sanaıdy. Sodan keıin qarajat bólemiz. Bárin túsinip otyrmyn, bári jaqsy bolady. Ádeıi kelip otyrmyn», - dedi Memleket basshysy turǵyndarmen kezdesýi barysynda.

Sondaı-aq Prezıdent Arys turǵyndaryna barlyq oblys, eń aldymen Úkimet kómektesetinin aıtty.

«Meniń tapsyrmam boıynsha barlyq oblys, eń aldymen Úkimet kómektesetin bolady. Sál-sál shydańyzdar, bári durys bolady. Bul máselelerdiń barlyǵyn jeke ózimniń baqylaýyma alamyn», - dedi Qasym-Jomart Toqaev.

Bolǵan oqıǵaǵa baılanysty Arystaǵy jarylystan zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastaldy.

Aktsııa aıasynda Mádenıet jáne sport mınıstrligi, Eńbek jáne halyqty áleýmettik qorǵaý mınıstrliginiń qyzmetkerleri bir kúndik jalaqysyn aýdaratyn boldy. Osy bastamaǵa depýtattar da qosylǵan.

Endi mine, ortaq iske «QazAqparat» ujymy da jumylyp otyr.