«QazAqparat» HAA Túrkııanyń «Anadoly» aqparat agenttigin 100 jyldyq mereıtoıymen quttyqtaıdy

NUR-SULTAN. QazAqparat – «Anadoly» túrik aqparat agenttiginiń qurylǵanyna 100 jyl tolyp otyr. Túrkııada ulttyq aqparattyq agenttikti qurý ıdeıasy 1920 jyldyń 31 naýryzynda Mustafa Kemal Atatúriktiń Geıve qalasyndaǵy temirjol stansasynda Júnis Nadı men Halıde Edıp atty eki jýrnalıstpen kezdesýi kezinde týǵan edi. Boljamdy nusqalardyń ishinde agenttikke «Túrik», «Ankara» nemese «Anadoly» dep at qoıý josparlanǵan. Kóp ótpeı «Anadoly» aqparat agenttigi 6 sáýirde resmı túrde ashylyp, jumysyn bastap ketti.

Osydan týra 100 jyl buryn Túrkııa halqynyń basynan memleket bolyp qaıta túleýiniń sheshýshi kezeńderi ótip jatqan edi. Álemdegi alpaýyt memleketterdiń Birinshi dúnıejúzilik soǵysynan keıin de Túrkııa jerinde qııan-keski urys, táýelsizdik úshin tartys bolyp jatty. Túrik halqynyń basynan ótkergen qıyn kezeńi tarıh sahnasyna Mustafa Kemal Atatúrikti alyp keldi. Antanta derjavalarynyń qysymy sol tusta memleket bolyp qaıta túleý úshin túrik halqynan birlik pen kúshti talap etken edi.

«Anadoly» Túrik Uly Ulttyq keńesi qabyldaǵan alǵashqy zańdardan bastap Túrik Respýblıkasynyń qurylýynyń ár belesinen aqparat berip, túrik halqynyń ult-azattyq kúresiniń árbir kezeńiniń kýási boldy.

1925 jyly aqparat agenttigi Atatúriktiń buıryǵymen «Anadoly» Túrik agenttigi korporatsııasyna aınaldy. Agenttikke táýelsiz mártebe berildi. Ol tusta mundaı mártebesi bar aqparattyq uıym Batys elderiniń ózinde de joq edi.

«Anadolynyń» qazirgi ýaqytta álemniń 30 elinde menshikti tilshiler qosyny bar. Agenttiktiń jańalyqtary túrik, alban, aǵylshyn, arab, bosnııa, kúrd, makedon, parsy, orys jáne frantsýz tilderinde shyǵyp turady. Aqparattyq agenttik Agence France-Presse (Frantsııa), Getty Images (AQSh), Associated Press (AQSh), ITAR - TASS (Reseı), Deutsche Presse-Agentur (Germanııa), EFE (Ispanııa), Islam Respýblıkasynyń aqparattyq agenttigi (Iran), Sınhýa (Qytaı), Kyodo News (Japonııa), Bernama (Malaızııa) sekildi aqparat agenttigimen seriktese jumys atqarady.

Al «QazAqparat» Halyqaralyq aqparat agenttigi men «Anadoly» agenttigi arasynda ózara yntymaqtastyq týraly kelisimge Ystanbulda 2018 jyldyń 10 sáýirinde qol qoıylǵan edi.

Agenttiktiń shtab-páteri Ankarada ornalasqan.

«QazAqparat» ujymy «Anadolyny» ǵasyrlyq toıymen quttyqtaı otyryp, túrkııalyq aqparat agenttiginiń eńbeginiń jemisti bolýyn tileıdi. Qazir álem koronavırýs ınfektsııasy týyndatqan pandemııa kezeńin basynan ótkerip jatyr. Іndet Qazaqstanmen qatar túbi túrki – Túrkııa memleketin de sharpydy. Koronavırýske qarsy kúrespen birge qazir álem memleketteri dúnıeni dúrliktirgen jalǵan aqparatpen kúndelikti maıdan júrgizýde. «Anadoly» aqparat agenttiginiń osyndaı qysyltaıań shaqta aýdıtorııaǵa shynaıy ári shuǵyl aqparatty jetkizip, halyqty ýaqtyly qulaqtandyryp otyrǵanyn oqyp, kórip otyrmyz. Endeshe túrkııalyq agenttiktiń keıingi jumysyna da sáttilik, qyzmetine tabys tilegimiz keledi.

Jaǵymdy jańalyqtardyń jarshysy bolyp júre berińizder!