«QazAqparat» HAA men Trend Ázerbaıjan agenttigi yntymaqtastyq týraly memorandýmǵa qol qoıdy
Búgin Bakýde «QazAqparat» HAA men Trend HAA arasynda yntymaqtastyq týraly jańa memorandýmǵa qol qoıý rásimi ótti. Qujatqa buqaralyq aqparat quraldarynyń bas redaktorlary qol qoıdy.
«Bizdiń úkimetter, memleket basshylarymyz josparlaǵan jobany esepke ala otyryp, eki agenttik arasyndaǵy yntymaqtastyq óte qajet dep oılaımyn. Buqaralyq aqparat quraldary Qazaqstandaǵy úderisterdiń qalaı júrip jatqanyn jáne osydan Ázerbaıjanda ne qoldanýǵa bolatynyn qamtýy kerek. Jáne kerisinshe bizdiń elde de sondaı bolýy tıis», - dedi «QazAqparat» HAA bas redaktory Bıbınor Tanelbaeva qol qoıý rásiminde.
Trend HAA bas redaktory Ilaha Mamedlıdiń sózinshe, aqparat agenttikteri uzaq ýaqyt boıy ózara aqparat almasyp keledi. Onyń pikirinshe, jańa kelisim ózara árekettestiktiń tıimdiligin arttyrýǵa yqpal etedi.
«Bul yntymaqtastyq uzaq merzimdi jáne tıimdi bolady dep úmittenemin. Eki el arasyndaǵy saıası, ekonomıkalyq qarym-qatynastyń damyp jatqanyn eskere otyryp, BAQ arasyndaǵy qatynastyń damýy da óte mańyzdy jáne paıdaly dep esepteımin», - dedi Ilaha Mamedlı.
Yntymaqtastyq týraly qol qoıylǵan memorandým aqparat almasý salasyndaǵy kásibı yntymaqtasty nyǵaıtady. Qujattyń basty maqsaty - dostyq qarym-qatynasty ornatyp, jemisti yntymaqtastyqqa qol jetkizý.