«QazAqparat» HAA aktsııasyna Qazaqstan jastary belsendi qoldaý bildirýde

ASTANA. QazAqparat - «QazAqparat» Halyqaralyq aqparat agenttiginiń  «Jańǵyrý joly» respýblıkalyq jastar qozǵalysymen birge iske asyrǵan áleýmettik jelilerdegi avatarǵa arnaıy freım ornatý aktsııasy elimizdegi jastar uıymynyń zor qoldaýyna ıe boldy.

Aıta ketsek, Qazaqstanda Jastar jylynyń ashylýyna oraı, áleýmettik jelilerdegi avatarǵa arnaıy freım ornatý aktsııasy bastalǵanyn habarlaǵan bolatynbyz.

Osylaısha, búginnen bastap, bul freımderdi aktsııaǵa qosylýdy qalaıtyn kez kelgen azamat «QazAqparat» HAA-nyń jastar.inform.kz qosymsha saıt-sattelıtinen júkteý ústinde.

«QazAqparat» HAA men Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń bul bastamasyn elimizdiń jas býyny belsendi túrde qoldaýda. Máselen, tústen beri 23 myńǵa tarta adam áleýmettik jelilerdegi avatarǵa arnaıy freım ornatyp úlgergen.

Eske sala ketsek, búgin EKSPO-2017 kórme keshenindegi «Nur Álem» pavılonynda «Táýelsizdik urpaqtary» taqyrybynda Jastar jylynyń ashylý saltanaty ótti.

Іs-sharaǵa Memleket basshysy, Úkimet músheleri, QR Parlamenti depýtattary, jergilikti atqarýshy organdar basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar, shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler jáne t.b. qatysty.