QazAqparat álemniń aqparat keńistiginde laıyqty orynǵa ıe – ÓzA basshysy
«Ózbekstannyń «ÓzA» ulttyq aqparat agenttigi jáne búkil ózbek halqy atynan «QazAqparat» Halyqaralyq aqparat agenttiginiń eńbek ujymyn ataýly kún - 100 jyldyq mereıtoımen quttyqtaýǵa ruqsat etińiz.
Búgingi tańda «QazAqparat» Halyqaralyq aqparat agenttigi óńirdiń jáne TMD-nyń ǵana emes, búkil álemniń aqparat keńistiginde laıyqty orynǵa ıe. Ózbekstannyń «ÓzA» Ulttyq aqparat agenttigi kóptegen jyldar boıy «QazAqparat» HAA-men jemisti jumys istep keledi. Osy seriktestik negizinde «ÓzA» Qazaqstanda iske asyrylyp jatqan túrlendirýler jóninde qajetti aqparatty Ózbekstan halqyna únemi jetkizip otyrady.
Osy turǵyda sońǵy jyldary Ózbekstan men Qazaqstan Prezıdentteriniń bastamalary men myqty saıası erik-jigeriniń arqasynda elder arasyndaǵy dostyq jáne baýyrlastyq qatynastar múlde jańa deńgeıge kóterilgenin atap ótkim keledi. Bul rette, aqparat salasyndaǵy yntymaqtastyq ta keńeıýde.
Máselen, 2019 jyly Ózbekstanda Qazaqstan jyly bolyp jarııalanýyna baılanysty, «ÓzA» saıtynda qazaq tilindegi nusqa iske qosyldy. «QazAqparat» Halyqaralyq aqparat agenttiginiń jańalyqtary ózbek tilinde de jarııalanyp otyrady. Bul, sózsiz, bárimizdi qýantady.
100 jyl – az ýaqyt emes. Qatal básekelestikke negizdelgen qazirgi aqparattyq ǵasyrda «QazAqparat» HAA-nyń respýblıkalyq, óńirlik jáne halyqaralyq aýqymdaǵy eń ózekti jańalyqtardy jarııalaýdaǵy jedeldigi, sondaı-aq óziniń berik ustanymyn pash etýi aıryqsha qurmetke laıyq.
Osy múmkindikti paıdalana otyryp, barshańyzdy mereıtoılaryńyzben taǵy da quttyqtaımyn. Halyqqa qyzmet etý, eki eldiń damýyna úles qosý, halyqtar arasyndaǵy baýyrlastyq baılanystardy odan ári nyǵaıtý jolyndaǵy qurmetti jumystaryńyzǵa zor tabys tileımin!», - dedi Abdýsaıd Kýchımov.